Semeı ákimi qoqys shyǵarý tarıfiniń ósýine qatysty túsinik berdi

SEMEI. QazAqparat – Semeı qalasynyń ákimi Baqytjan Baıahmetov qoqys shyǵarý tarıfiniń ósýine qatysty túsinik berdi, dep habarlaıdy QazAqparat tilshisi.

«Osy jyldyń qańtarynda jańaekologııalyq kodeks qabyldanǵany belgili. Sondaı-aq 14 qyrkúıekte QR Ekologııa, geologııa jáne tabıǵı resýrstar mınıstriniń №377 buıryǵymen turmystyq qatty qaldyqty jınaýǵa, tasymaldaýǵa, suryptaýǵa jáne kómýge arnalǵan tarıfti esepteý ádistemesi bekitildi. Osyǵan baılanysty, dál osy ýaqyttan bastap bizde tarıfti qaraýǵa jáne kommýnaldyq qaldyqtardyń paıda bolý jáne saqtaý normalaryn ázirleýge kirisý múmkindigi paıda boldy», - dep jazdy ákim Facebook-tegi paraqshasynda.

Onyń aıtýynsha, osy ýaqyt ishinde arnaıy qurylǵan jumys toby kommýnaldyq qaldyqtardy basqarý boıynsha baǵdarlama ázirledi.

«Bul qujat bilikti jáne jan-jaqty saraptamalyq qorytyndy shyǵarý úshin ártúrli sarapshylardyń qaraýyna jiberildi. Jumystyń nátıjeleri aıdyń sońyna deıin alynady dep kútilýde. Ázirlengen is-qımyl algorıtmi boıynsha jeltoqsan aıynyń basynda ne ortasynda bul másele máslıhat sessııasynyń bekitýine shyǵarylatyn bolady. Tarıfterdi qarastyrý máselesiniń ózektiligine baılanysty, Semeı turǵyndaryn Egov memlekettik portalyndaǵy talqylaýǵa qosylýǵa jáne usynylǵan sheshimderge qatysty pikirin bildirýge shaqyramyn», - dedi ákim.

Esterińizge sala ketsek, osyǵan deıin Semeıde qoqys shyǵarý tarıfi ósýi múmkin ekendigin habarlaǵan bolatynbyz.