Semeı ákimdigi kóshede kesilip jatqan aǵashtarǵa qatysty pikir bildirdi
Qala turǵyndarynyń qaýipsizdigin qamtamasyz etý úshin aǵashtardyń shirigen, qýraǵan butaqtary kesilip jatyr. Biraq áleýmettik jelide qolyna ara ustaǵan jigitterdiń tipti jaıqalyp turǵan jelekterdi de kesip jatqan beınejazbasy taralyp ketti. Turǵyndardyń narazylyǵyn týǵyzǵan máselege qalalyq qoǵamdyq keńes músheleri men sybaılas jemqorlyqqa qarsy arnaıy baqylaý tobynyń músheleri aralasty. Arnaıy jıyn ótip, máselege qatysty qalalyq TÚKSh bóliminiń jetekshisi Amantaı Ótelbaev jaýap berdi. Aıtýynsha, munyń bári halyqtyń ıgiligi úshin jasalyp jatyr. Jyl saıyn qaladaǵy jasyl jelekti baptaýǵa qarjy bólinedi. Bıyl bul maqsatqa 13,5 mıllıon teńge qaralǵan. Al aǵash otyrǵyzý úshin 25 mıllıon teńge jumsalady. Sondyqtan kóshelerde eskirgen aǵashtardy kesý jumysy dástúrli túrde jyl saıyn júredi.
«2016 jyldan beri apattyq jaǵdaıda turǵan aǵashtardy, olardyń eskirgen butalaryn kesý úshin bıýdjetten aqsha bólinedi. ıAǵnı, búginde qala kóshelerine aǵash otyrǵyzý máselesi de bir jolǵa qoıylǵan. Mysaly, bıyl Abaı, Morozov kósheleri men Nevzorovtar otbasy atyndaǵy murajaı mańyna jańadan qaıyń, sheten, jóke aǵashtary otyrǵyzyldy. Sonymen qatar, bıyl áýejaı mańyna aǵash egý úshin qarajat bólindi. Búginde 6 myń túp aǵash egildi. Al qaýipti dep sanalǵan aǵashtar men onyń butalary turǵyndarǵa qaýipti. Bul jerde zańǵa qaıshy áreket jasalyp jatqan joq», - dedi Amantaı Ótelbaev.
Jalpy jyl basynan beri Semeıde jasyl ekpelerdi kútip ustaý jáne qorǵaý qaǵıdalaryn buzǵan 318 adam ákimshilik jaýapkershilikke tartylǵan. Al zańsyz aǵash kesken 11 adamǵa qatysty qylmystyq is qozǵaldy.
