Shotlandııalyq BAQ almatylyq klýbtan jeńilgen «Seltıkti» synady
ASTANA. KAZINFORM – Sársenbi kúni almatylyq «Qaırattan» jeńilgen «Seltık» týraly shotlandııalyq basylymdarda synı maqalalar jarııalandy, dep habarlaıdy Kazinform menshikti tilshisi.
The Scotsman gazeti slektsııasy syr bergen klýb basshylyǵynyń jumysyn, túsiniksiz transferlik saıasatyn, komanda fýtbolshylarynyń súreńsiz oıynyn, penaltı serııasyndaǵy qatelikterdi ashyq jazyp, klýbty synǵa aldy.
— Bul sátsizdikti eshbir sózben «aqtap alý» múmkin emes. «Seltık» fýtbol klýbynyń fýtbolshylary 120 mınýtta qarsylas qaqpasyna birde-bir gol soǵa almady. Penaltı serııasynda da «Seltık» bes soqqynyń ekeýin ǵana saldy. Chempıondar lıgasynyń toptyq kezeńine beriler joldamany ıelengen «Qaırat» ózinen áldeqaıda tanymal ári joǵary jalaqy alatyn oıynshylarǵa qarsy batyldyq pen minez tanytyp, laıyqty túrde jeńiske jetti, - dep jazdy basylym.
The Scotsman atap ótkendeı, qazaqstandyq oıynshylar qýanyshtan alańǵa júgirip shyqqanda «Seltık» fýtbolshylary qarsylastaryna tańdana qarap turdy.
— Tórt saǵattyq ýaqyt beldeýimen aıyrmashylyǵy bar, bıik taýly aımaqta ornalasqan, aýa raıy aptap ystyq azııalyq qalaǵa sapar — aýyr synaq bolatynyn bári túsindi. Biraq «Seltıktiń» ózinen deńgeıi tómen klýbtan Chempıondar lıgasynda jeńilýge quqyǵy joq edi. Ashýly jankúıerler eń aldymen klýb basshylyǵyn aıyptady. Klýbtyń 50 mıllıon fýnttan astam qarjy qory bola tura, quramdy kúsheıtpeı-aq Chempıondar lıgasyna shyǵamyz degen úmitteri kúırep qaldy. Shotlandııa chempıondary Eýropa lıgasyna jol tartty. «Seltık» endi eýropalyq elıtanyń qatarynda emes, - dep jazdy The Scotsman.
Daily Record shotlandııalyq komandanyń Chempıondar lıgasynyń toptyq kezeńinen tys qalýy «Seltıkti» mol qarjy men bedelinen aıyrdy. Sonymen qatar bas bapker Brendan Rodjers te qyzmetinen ketýi múmkin dep esepteıdi.
— Chempıondar lıgasyna qatysý múmkindiginen aıyrylǵan «Seltık» endi Brendan Rodjersti osy maýsymnan keıin jiberýi múmkin. Atalǵan maman eki jyl buryn komandaǵa oralǵandaǵy basty maqsaty klýbty jańa deńgeıge kóterý ekenin aıtqan. Biraq ol oıy júzege aspady. Ótken maýsymda Rodjers komandany pleı-off kezeńine deıin jetkizip, bolashaǵynan úmit kúttirgen. Alaıda keıingi kezde «Seltıktiń» oıyny men damý saıasaty keri kete bastady. Endigi kezekte quramdy kúsheıtýdiń ne keregi bar?! Klýb tek bul matchty ǵana emes, joǵary deńgeıli bapkerin de joǵaltqan sekildi, - dep jazdy atalmysh basylym.
Sondaı-aq Daily Record basylymy «Qaırat» qarymta kezdesýde úsh kóshbasshy oıynshysy alańda bolmasa da shotlandııalyqtarǵa laıyqty deńgeıde qarsylyq kórsete bilgenin atap ótken.
— «Chelsımen» aldyn ala kelisimshart jasasqan jas talant Dastan Sátpaev oıynnan shettetildi. Al, birinshi oıyndaǵy alǵan jaraqatynan keıin komandanyń negizgi qaqpashysy Aleksandr Zarýtskıı men jattyǵý barysynda jaraqattanǵan shabýylshy Edmılson oıynnan tys qaldy. Degenmen «Qaırat» komandasy «Seltıkpen» ashyq aıqasqa daıyn boldy. Iá, ushý ýaqyty uzaq, stadıondaǵy atmosfera da qyzý boldy. Biraq bul Chempıondar lıgasyndaǵy ese jiberetin komanda emes edi, - dep atap ótti Daily Record.
The Celtic Star jankúıerler resýrsy «Seltık» basshylyqtyń álsizdiginen jeńilip jatqanyn, al «Qaırattan» jeńilis komandany qaıta qurylymdaý jáne jańartý keregin kórsetkenin jazdy.
— Shynyn aıtaıyq, «Seltık» keri ketip barady. Kóp aqsha jumsap, osynshama joldy artqa tastaǵan jankúıerlerdiń komandadan qatty kóńili qalǵan, - dep jazdy onlaın-resýrs.
The Celtic Star bul sátsizdikke tikeleı klýb basshylyǵyn kinálady.
— Búgingi jeńilistiń jalǵyz «oń tusy» osy. Birinshiden, bul bizge, jankúıerlerge klýbty qaıta qurýǵa múmkindik berip otyr. Ekinshi «oń tusy» — «Seltıktiń» osy maýsymdaǵy jaǵdaıyn aıqyndap berdi. Biz jaǵdaıy tyǵyryqqa tirelgen klýbpyz jáne búgin oǵan áldeqaıda erterek kýá boldyq. Mundaı keri ketý basshylyqtyń sátsiz jumysynan keıin bolyp otyr, - dep atap ótti The Celtic Star.
Eske sala ketsek, oıynnan keıin ótken baspasóz máslıhatynda BAQ ókilderi Rafael Ýrazbahtındi onyń atyn urandata qarsy aldy. Alaıda «Qaırattyń» bas bapkeri ózin emes, almatylyq ujymnyń atyn uran etýge shaqyrdy.