«Seltıktiń» bas bapkeri: Oıyn deńgeıi tómen boldy, biraq «Qaıratty» quttyqtaımyn

ALMATY. KAZINFORM — «Qaırat» óz alańynda «Seltıkti» penaltı arqyly jeńip, ÝEFA Chempıondar lıgasynyń toptyq kezeńine ótti.

Oıynnan keıingi baspasóz máslıhatynda «Seltıktiń» bas bapkeri Brendan Rodjers match týraly pikir bildirdi.

— Oıyn osal ótti. Bizdiń sátterimiz boldy, biraq ony paıdalana almadyq. Jalpy oıyn deńgeıi tómen boldy. Mundaı oıyndarda gol soqpasań, penaltı serııasynda bári de bolý múmkin. Toptyq kezeńge shyqqymyz keldi. Biraq shyǵa almadyq, ony moıyndaý kerek. Chempıondar Lıgasy bizden kóbirek nárse talap etedi, — dedi ol.

Sondaı-aq Brendan Rodjers «Qaıratty» jeńisimen quttyqtady.

— Biz úıde gol soǵýymyz kerek edi. Biraq ony aıtpaı, búgingi oıynǵa toqtalsaq, nashar bolyp shyqty. Dese de, men «Qaıratty» jeńisimen quttyqtaımyn. Óte myqty komanda, óte myqty qarsylas, — dedi ol.

«Seltıktiń» bas bapkeri óz komandasyna bul oıynnan sabaq alyp, alǵa qaraı umtylýy kerek ekenin aıtty.

— Kásibı turǵyda kúızeliske tózimdi bolýymyz kerek. Biz fýtbol komandasy retinde artqa qarap, odan sabaq alyp, alǵa jyljýymyz kerek, — dedi bapker.

Eske salaıyq, «Qaırat» fýtboldan Chempıondar lıgasynyń negizgi kezeńine joldama aldy.