«Seltıktiń» bas bapkeri: Mensinbeýshilik bolmady, «Qaırat» - myqty qarsylas

ALMATY. KAZINFORM — Almatyda «Seltık» fýtbol klýbynyń bas bapkeri Brendan Rodjerstiń qatysýymen baspasóz máslıhaty ótti.

26 tamyz kúni saǵat 21:45–te Almatynyń Ortalyq stadıonynda ÝEFA Chempıondar lıgasynyń pleı-off kezeńi aıasynda «Qaırat» pen «Seltık» arasynda qarymta oıyn ótedi. Match aldyndaǵy baspasóz máslıhatynda BAQ ókilderi Brendan Rodjersten «Seltık» alǵashqy oıynda bizdi mensinbedi» degen Rafael Ýrazbahtın sózine qatysty pikirin bildi.

— Joq, olaı emes. Biz ár qarsylasqa árdaıym qurmetpen qaraımyz. Tek alǵashqy oıynda óz deńgeıimizdi kórsete almadyq, ásirese birinshi taımda. Biraq alda ekinshi oıyn bar, bárin túzetýge múmkindik bar. Biz «Qaırattyń» myqty qarsylas ekenin jaqsy túsinemiz, ony jeńý ońaı emes. Erteń bári bizdiń oıynymyzǵa baılanysty bolady, — dedi ol.

Onyń aıtýynsha, shotlandııalyq ujymnyń oıynshylary bul kezdesýdi taǵatsyzdana kútip júr, óıtkeni bul — olar úshin jańa synaq.

— Biz úshin qazir eń mańyzdysy — Chempıondar lıgasy. Erteń qajetti nátıjege qol jetkizýge tyrysamyz. Eger tek nátıje týraly oılasaq, bul oıynshylardy tejeıdi. Biz alańǵa fýtbol oınaý úshin shyǵamyz. Erteń jankúıerler qyzyqty match kóretinine senimdimin, — dedi ol.

Brendan Rodjers «Qaıratpen» óz alańyndaǵy teń oıynnan keıin «Seltıkke» aıtylǵan synǵa qatysty pikir bildirdi.

— Shyn máninde bul bizge áser etpeıdi. Biz jaǵdaıdy tolyq baqylaýda ustap otyrmyz. Iá, biz maýsymdy endi bastadyq, biraq komanda ózin kórsete bildi. Oıynshylar aldaǵy mindetterdi túsinip otyr. Sondyqtan syrttaǵy áńgimeler bizge áser etpeıdi, — dedi ol.

Sondaı-aq ol Qazaqstanǵa uzaq sapardy syltaý etpeıtinin atap ótti.

— «Qaırat» Glazgoda jol men ýaqyt aıyrmashylyǵyna qaramastan jaqsy oınady. Biz de tıisti daıyndyq ústindemiz. Búgin jeńil jattyǵý ótkizip, alańmen tanysamyz da, matchqa tolyq daıyn bolamyz, — dedi bapker.

Sonymen qatar ol «Qaırattyń» jas juldyzy Dastan Sátpaev týraly óz oıyn aıtty.

— Ol bolashaǵy zor oıynshy. Ony «Chelsı» klýby baqylap júrgenin bilemin. Biraq «Qaırattyń» kúshi bir oıynshyda emes, komandalyq oıynda. Biz qarsylasqa qurmetpen qaraımyz, biraq óz oıynymyzǵa kóńil bólemiz, — dedi ol.

Rodjers Qazaqstanǵa buryn da kelgenin, komandasy «Astanamen» oınaǵanyn eske aldy. Ol eldiń sulýlyǵyn jáne Almatynyń zamanaýı, qarqyndy damyp kele jatqan qala ekenin atap ótti.

Eske salaıyq, búgin baspasóz máslıhatynda «Qaırat» fýtbol klýbynyń bas bapkeri Rafael Ýrazbahtın alǵashqy oıynda qarsylas tarapynan mensibeýshilik boldy dep boljaǵan edi.

«Qaırat» — «Seltık» matchynda qaýipsizdikti 1,5 myń polıtsııa qyzmetkeri qamtamasyz etedi.

Buǵan deıin «Qaırat» — «Seltık» matchyna alypsatarlar bıletti 5 myńnan 100 myń teńgege deıin satyp jatqanyn jazǵanbyz.