«Seltıkpen» qarymta kezdesý: Glazgoda «Astanany» ne kútedi?
ASTANA. QazAqparat - Tamyz aıynyń 3-nen 4-ne qaraǵan túni «Astana» fýtbol klýby ÝEFA Chempıondar lıgasynyń úshinshi aınalymynda Shotlandııa chempıony «Seltık» komandasymen qarymta kezdesý ótkizedi. Osy oıyn qorytyndysy boıynsha, ÝEFA Chempıondar lıgasynyń toptyq kezeńine ótetin klýb belgili bolmaq.
Fýtbol komandasy úshin jankúıerler janynda, óz alańynda oıyn ótkizý ár kezde de kúsh beretini anyq. Degenmen, Glazgoda bul tásil olarǵa kómek bere alady ma? Árıne! Sebebi,«Seltık» óz stadıonynda eshkimge des bermeıtin alapat kúshke aınalatyn bári biledi. Ózge stadıondarda jeńilip, keıin óz úıinde qarsylasyn talqandap tastaǵan kezderi de az emes.
«Astana Arena» stadıonyndaǵy úsh jyl burynǵy oıyn kópshiliktiń esinde bolar... Ol kezde qaraǵandylyq «Shahter» «Seltıkti» 2:0 esebimen jeńip, aıdy aspanǵa biraq shyǵarǵan edi. Alaıda, Glazgoda shabýyldaýshy komanda retinde tanylmaǵan «Seltık» qaraǵandylyqtardyń qaqpasyna 3 jaýapsyz gol saldy.
2016 jylǵy ChL biliktilik raýndynda «Seltık» eshkimge belgisiz Gıbraltardyń «Lınkoln» klýbyna 0:1 esebimen jol jergen. Alaıda, Glazgoda 0:3 etip, jeńiske jetti. Biraq, eýrokýbokta endi ǵana aıaq alyp kele jatqan komandaǵa jol berip qoıǵan «Seltık» fýtbolshylarynyń burynǵy qahary seıilgendi baıqaýǵa bolady. Byltyrǵy Chempıondar lıgasynyń maýsymynda pleı-off kezeńinen Shvetsııanyń Malme komandasy «Seltıkti» joldan taıdyrdy.
Osydan soń, shotlandııalyq chempıon Eýropa lıgasynda alty matchtyń birin de jeńe almady. Qarsylastary da sonshalyqty myqty deýge de kelmeıdi. Glazgoda ol «Aıaks» pen «Moldege» birdeı eseppen 1:2 jeńilis tapty. «Seltıktiń» eýrokýbokterdegi aıaqalysyn baǵamdaı otyryp, «Astana» klýbynyń bas bapkeri Stanımır Stoılovtyń sózimen kelisýge bolady: «Fýtbolda favorıtter ǵana jeńiske jete bermeıdi».
Eske sala keteıik, birinshi oıyn 27 shildede Qazaqstan astanasynda ótti jáne 1:1 esebimen aıaqtalǵan bolatyn. Astanalyqtardyń joǵary belsendiliginen, ústi-ústine jasalǵan qaýipti shabýyldarynan qatty sasqan «keltter» osy eseptiń ózin jeńiske balady. «Seltıktiń» bas bapkeri Brendon Rodjers: «Astanamen» bolǵan teń esepti baǵalaý qıyn» dep jarııalady.
«Astanaǵa» keletin bolsaq, onyń eýrokýboktardaǵy joly 2013 jyly bastaldy. Ol maýsymda Eýropa lıgasynyń biliktilik kezeńinde astanalyqtar bolgarııalyq «Botev» klýbyna eki kezdesýdiń qorytyndysy boıynsha, 6:0 esebimen jeńilis tapty. Alaıda eki jyldan keıin «Astana» fýtbolshylary lıganyń toptyq kezeńine ótip, «Benfıkamen», «Galatasaraımen» jáne «Atletıko» (Madrıd) klýbtarymen teń oınady.
«Astana» óziniń jetistikterin qaıtalaı alady ma? Bul tamyzdyń 3-nen 4-ne qaraǵan túni belgili bolady. Match Astana ýaqytymen 00:45-te bastalady. Oıyndy tikeleı efırde «Qazaqstan» telearnasy kórsetedi. Kelesi týrǵa ótý úshin «Astanaǵa» jeńis kerek nemese 2:2 esebi, ne odan joǵary nátıjeli teń oıyn qajet.
