«Seltık» - «Shahter» qarymta oıynyna norvegııalyq qazy tórelik etedi
ASTANA. 27 tamyz. QazAqparat - Fýtboldan ÝEFA Chempıondar lıgasynyń fınaldyq irikteý kezeńiniń shotlandııalyq «Seltık» pen qazaqstandyq «Shahter» arasyndaǵy qarymta kezdesýine Sveın Oddvar Moen bastaǵan norvegııalyq qazylar brıgadasy tórelik etedi, dep habarlaıdy Vesti.kz.
Moenge Kım-Tomas Haglýnn men Frank Andas kómektesedi, al Kım-Anrı Ionsen men Sveın-Erık Edvartsen qosymsha tóreshiler bolady. Tórtinshi tóreshi - Sven-Erık Mıdthell. Chernogorııalyq Mıroslav Djýkanovıch ÝEFA delegaty bolsa, ıspanııalyq Manýel Mehýto Gonsales baqylaýshy atanady.
Moen 1996 jyldan fýtbol matchtaryna tórelik etip keledi. 2005 jyldan halyqaralyq deńgeıdegi oıyndarǵa qazylyq etedi. 2012 jyldyń sáýirinde FIFA ony 2014 jylǵy álem chempıonatynda qazylyq etýge úmitker tóreshiler tizimine qosty.
Esterińizge sala keteıik, «Shahter» men «Seltık» arasyndaǵy match tamyzdyń 28-nen 29-na qaraǵan túnde Glazgo qalasyndaǵy «Seltık Park» stadıonynda ótedi. Oıynnyń bastalýy Astana ýaqytymen 00:45-te. Matchty tikeleı efırden KTK arnasy kórsetedi.
«Astana-Arena» stadıonynda ótken alǵashqy matchta «Shahter» «Seltıkti» 2:0 esebimen tize búktirgen bolatyn. Doptardyń avtorlary - Andreı Fınonchenko men Sergeı Hıjnıchenko.
