«Seltık» «Astana-Arena» stadıonynda qurbandyq shalǵany úshin ÝEFA-ǵa shaǵymdanbaq
ASTANA. 22 tamyz. QazAqparat - «Jyǵylǵan kúreske toımaıdy» demekshi, «Saryarqa» tósinde oısyrata jeńilis tapqan shotlandııalyq «Seltık» komandasy qurbanǵa shalynǵan qoıdyń qanyn kórip, «Astana-Arena» alańda durys oınaı almadyq dep, ÝEFA-ǵa «Shahterdiń» atyna shaǵym túsirmekshi, dep jazady www.bnews.kz saıtynda «Sovetskıı sport» basylymyna silteme jasap.
Aqparatqa sáıkes, janýarǵa degen mundaı qarym-qatynasty kórgen shotlandyqtar psıhologııalyq kúızelis alyp, onyń saldary oıyn barysyna áser etti-mis. Qonaqqa kelgen fýtbolshylar alańda qannyń izin kórip, qatty shoshyǵan eken, dep jazady Interfaks.
Al ÝEFA-nyń baspasóz ofıtseri Sergeı Borısov qurbandyqqa shalynǵan qoıǵa bola shaǵym túsirý «Seltıkke» jaqsy at ápermeıdi dep otyr.
«Eshqandaı erejede qurbandyq shalýǵa tyıym salynbaǵan. Eger de «Seltık» sondaı shaǵym túsiretin bolsa, ony qanaǵattandyrýǵa eshqandaı negiz kórip turǵan joqpyn. Jáne qurbandyqqa shalý rásimi resmı shara, jattyǵý nemese baspasóz májilisi barysynda jasalǵan joq. Eger komanda óz dástúrine saı áreket jasasa, ol onyń jeke sharýasy. Sondyqtan osynaý shaǵymdy ÝEFA-da áldebireý shyndap qarastyrýǵa kirisedi degenge óz basym sene qoımaımyn», - dep mysalǵa keltiredi ITAR-TASS Borısovtyń pikirin.
