Selın Dıon alty jyldyq úzilisten keıin sahnaǵa qaıta oraldy
ASTANA. KAZINFORM – Kanadalyq ánshi Selın Dıon alty jyldyq májbúrli úzilisten keıin senbi kúni Parıjde sahnaǵa qaıta oraldy. Nanterdegi Plenitude Arena arenasynda ótken alǵashqy tolyqqandy kontsertin ol 30 myń kórermen aldynda ótkizdi. Bul týraly Euronews jazdy.
2022 jyly ózine «qatań adam sındromy» dep atalatyn sırek kezdesetin nevrologııalyq aýrý dıagnozy qoıylǵanyn jarııalaǵan ánshi sahnaǵa shyqqan sátte kóz jasyna erik berdi.
– Bul jol ońaı bolǵan joq, sapar kútkenimnen de uzaqqa sozyldy. Biraq meni alysta, taýlardyń bıiginde álsiz jylt etken jaryq ózine tartyp turdy. Búgin keshte men sizder úshin án aıtqym keledi. Ózim úshin án aıtqym keledi. Ómir úshin án aıtqym keledi, – dedi Selın Dıon kórermenderdiń zor qoshemetine bólenip.
Odan keıin ánshi óziniń eń tanymal ári kópshilik súıip tyńdaıtyn hıtterin oryndady. Olardyń qatarynda «My Heart Will Go On» jáne «Because You Loved Me» ánderi bar. Kontsert kórermender men mýzyka synshylary tarapynan joǵary baǵalandy.
Senbidegi kontsertke AQSh-tyń burynǵy birinshi hanymy Mıshel Obama jáne birqatar frantsýz saıasatkerleri, sonyń ishinde Gabrıel Attal men Edýar Fılıpp qatysty degen aqparat bar.
Bul kontsert buryn La Défense Arena dep atalǵan Plenitude Arena-da ótetin 26 keshten turatyn kontsertter serııasynyń alǵashqy sharasy boldy.
Kanadanyń premer-mınıstri Mark Karnı Selın Dıondy uzaq jyldan keıin sahnaǵa qaıvta oralýymen quttyqtady.
It’s all coming back.
— Mark Carney (@MarkJCarney) September 12, 2026
Congratulations, @celinedion, on an incredible return to the stage after six long years. https://t.co/9sm8nXHGf6
2022 jylǵy jeltoqsanda Selın Dıon ózine «qatań adam sındromy» dıagnozy qoıylǵanyn habarlaǵan. Bul – bulshyqetterdiń qataıýy men túıilýine ákelýi múmkin sırek kezdesetin aýtoımmýndy nevrologııalyq aýrý.
Emi joq bul dert ánshini kontsertterin alty jylǵa toqtatýǵa májbúr etti. Osy ýaqyt ishinde onyń sahnaǵa qaıta orala alatynyna kúmán keltirgender de boldy.
Eske sala keteıik, buǵan deıin kanadalyq áıgili ánshiniń osy jyldyń ekinshi jartysynda sahnaǵa oralýǵa daıyndalyp jatqanyn jazyp edik.
