Selfı jasamaq bolǵan jigit Úlken Almaty kólinde plotınadan qulap ketti
ALMATY. QazAqparat – Almatyda er adam Úlken Almaty kólinde selfı jasamaq bolǵanda quzdan qulap ketken, dep habarlaıdy QazAqparat tilshisi.
«14 maýsymda keshke Respýblıkalyq jedel qutqarý jasaǵynyń kezekshi bólimine mertikken jigit týraly aqparat tústi. Kýágerler habarlaǵandaı, Úlken Almaty kólindegi bıiktigi 50 metr plotınadan selfı jasamaq bolǵan jigit tómenge qulap ketken jáne tómennen shyǵyp jatqan aıǵaıǵa qaraǵanda ol – tiri», - dedi Respýblıkadyq jedel qutqarý jasaǵynan.
Alpınıstik qural-jabdyqpen túsken qutqarýshylar kaskadty baspaldaqtardyń birinen jigitti alyp shyqty.
«Onyń tek 2 saýsaǵy synyp, san eti jyrylǵan. Qutqarýshy medıkter jigitti alpınıstik trospen alyp shyǵyp, jedel járdemge tabystady», - dedi Respýblıkalyq jedel qutqarý jasaǵynyń baspasóz qyzmetinen.
35 jastaǵy er adam ádemi fonda selfı jasamaq bolyp, tehnıkalyq baspaldaqqa shyqqan.
Tepe-teńdik saqtaı almaǵan soń tómenge quldılap ketken.
