Selfı jasamaq bolǵan bozbalany poıyz qaǵyp ketti
ASTANA. QazAqparat - Sársenbi kúni keshkisin Italııanyń ońtústigindegi Taranto jáne Redjo-dı-Kalabrııa qalasynyń arasyndaǵy temir jol ýchaskesinde oqys oqıǵa oryn aldy, dep habarlady beısenbi kúni jergilikti BAQ.
Úsh jasóspirim bala qatty jyldamdyqpen kele jatqan júrdek poıyzdyń aldynda sýretke túspekshi bolady. Alaıda olardyń bul oıy qaıǵyly jaǵdaımen aıaqtaldy. 13 jasar Leandro Chelııa temir joldan shyǵyp úlgermeı, qaza tapty. Onyń eki joldasy kishigirim jaraqat alyp, tiri qalǵan.
Balalar medıtsınalyq tekseristen keıin Katandzaro qalalyq prokýratýrasyna shaqyrtyldy. Olardyń aıtýynsha, balalar temirjoldan sekirýge bettegende Leandronyń bógelip qalǵany nemese súrinip ketkeni belgisiz, áıteýir kesh qalǵan. Poıyz mashınısti balalardyń jaýabyn rastaǵan. Ol shamnyń jaryǵynda úsh balany kórgen. Onyń ekeýi qashyp úlgerip, al úshinshisi qalyp qoıǵan. Temirjolshynyń aıtýynsha, poıyzdyń jyldamdyǵy quramdy toqtatyp, qaıǵyly jaǵdaıdyń aldyn alýǵa múmkindik bermegen.
