Selfı jasamaq bolǵan 18 jasar boıjetken órtenip ketti
ASTANA. QazAqparat - Rýmynııada eki boıjetken poıyzdyń ústine minip, fotosýretke túsý úshin temirjol stansasyna bardy. Onyń tóbesine shyqqan boıjetkenderdiń biri abaısyzda aıaǵymen elektr symyn qozǵap qalǵan, dep habarlaıdy Euromag.ru.
Sonyń saldarynan 27 000 volttyq kerneý alǵan ol birden otqa orandy. Toq kerneýi tıgen onyń 17 jasar qurbysy poıyz tóbesinen jerge qulap túsken.
Sol kezde jaqyn jerden er adam ótip bara jatqan. Ol kıimi órtenip jatqan boıjetkendi apattyq qyzmetterdiń kelýine deıin qutqarýǵa asyǵyp, poıyzdyń ústine shyqqan. Biraq boıjetkendi aman alyp qalý múmkin bolmady: denesiniń 50 paıyzdan astamyn kúıik shalǵan ol aýrýhanada kóz jumdy. Onyń qurbysy da aýrýhanaǵa jetkizildi. Dárigerlerdiń aıtýynsha, onyń ómirine esh qaýip tónip turǵan joq.
