Selektorlyq keńeste astyq tasymaldaý máselesi qaraldy - KKM
ASTANA. 21 jeltoqsan. QazAqparat - Búgin QR Kólik jáne kommýnıkatsııa mınıstri Berik Kamalıev pen QR Aýyl sharýashylyǵy mınıstri Asyljan Mamytbekov, sondaı-aq «Qazaqstan temir joly» UK» AQ, «Azyq-túlik kontraktilik korporatsııasy» UK» AQ, «KazAgro» AQ jáne «Qazaqstan astyq odaǵy» ZTQ basshylarymen birlesip, astyqty tasymaldaý máselesi boıynsha selektorlyq keńes ótkizdi.
Selektorlyq keńeske Qostanaı, Soltústik Qazaqstan jáne Aqmola oblystary ákimdikteriniń ókilderi, sonymen birge astyq jóneltýshiler qatysty.
Keńesti asha otyryp, Berik Kamalıev atalǵan másele Úkimettiń turaqty nazarynda ekenin atap ótti.
Aǵymdaǵy jylǵy 13 jeltoqsanda ótken selektorlyq keńeste astyqty tasymaldaýdyń qarqyny oıdaǵydaı bolǵany aıtyldy. Atap aıtqanda, «Qazaqstan temir joly» UK» AQ qazan, qarasha aılarynda sáıkesinshe 1 mln. 193 myń tonna jáne 1 mln. 272 myń tonna astyq tasymaldady.
Aǵymdaǵy jylǵy 21 jeltoqsandaǵy jaǵdaı boıynsha josparlanǵan (1 mln. 100 myń) kólemnen 642 myń tonnasy tasymaldandy.
Aýyl sharýashylyǵy mınıstrliginiń Veterınarlyq baqylaý komıteti jáne Memlekettik ınspektsııasy demalys jáne mereke kúnderi barlyq beketterdiń jumys jasaýyn qamtamasyz etý tapsyrmasyn tolyq oryndady.
Kedendik baqylaý ornatylmaǵan stansalarda astyqty tasymaldaýdyń kedendik úzdiksiz rásimdelýin qamtamasyz etý máselesi áli sheshilmegen. Osylaısha, Aqmola oblysyndaǵy Ereımentaý, Jaltyr jáne Esil stansalarynda osyndaı jaǵdaı qalyptasty. Qarjy mınıstrligi Kedendik baqylaý komıtetiniń aqparaty boıynsha, atalǵan másele qosymsha shtattyq birlikter men beketter jumysy úshin qajetti baılanys arnalarynyń bolmaýy sebebinen qysqa merzimde sheshilmeıdi. Osyǵan oraı, aýmaqtyq kedendik organdarǵa demalys jáne mereke kúnderi atalǵan beketterge jaqyn stansalardaǵy beketterdiń jumysyn qamtamasyz etý tapsyryldy.
Sonymen qatar, astyq qabyldaý kásiporyndarynyń astyqty tıeý jáne túsirý kezindegi úzdiksiz jumysyn uıymdastyrýdy qamtamasyz etý máselesinde ózara is-qımylyn úılestirý jóninde qıynshylyqtar bar. Keıbir astyq tıeý kásiporyndary demalys jáne mereke kúnderi astyqty tıeýdi uıymdastyrmaǵan.
Keńes barysynda tıisti memlekettik organdar men kásiporyndardyń basshylary tyńdaldy. Onyń qorytyndysy boıynsha hattama jasalyp, astyqty úzdiksiz tasymaldaýdy qamtamasyz etý jóninde tapsyrmalar berildi.
