Sel júrgen Tólebıde 38 úı súrilip, ornyna jańa baspana salynady
TÓLEBI. QazAqparat – Túrkistan oblysy Tólebı aýdanynda sý tasqynynan kelgen zardapty qalpyna keltirý jumysy qyzý júrgizilip jatyr. Bul jumysqa 8 merdiger kompanııa men 6 ınjınırıngtik qyzmet kórsetýshi mekeme jumyldyrylǵan, dep habarlaıdy QazAqparat tilshisi.
Atalǵan aýdanda mamandardyń qorytyndysymen 38 úı jaramsyz dep tanylǵan bolatyn. Qazirgi tańda 17 úı buzylyp jatyr. Onyń ishinde 3 úıdiń irgetasyn quıý jumystary bastaldy.
Sel saldarynan 78 azamat evakýatsııa ortalyǵyna jatqyzylsa, qazirgi tańda 40-tan astam azamat aǵaıyn-týystarynyń úıine jaıǵasqan. Aýdan ákimi Baýyrjan Omarbekovtyń aıtýynsha, evakýatsııa ortalyǵynda ornalasqan azamattar úsh mezgil tamaqpen qamtylǵan. Olarǵa barlyq qajetti jaǵdaı jasalǵan.
«Zardap shekken 38 baspana tolyqtaı súrilip, ornyna jańa baspana salynady. Olardy qalpyna keltirý jumystaryna 510 mln teńge baǵyttalmaq. Jalpy qurylys jumystaryn 1.5-2 aı ishinde aıaqtaýdy josparlap otyrmyz»,- dedi Baýyrjan Omarbekov.
