Sel júrgen Penjim aýylynda apatty dep tanylǵan úı joq - ákimdik
JARKENT. QazAqparat- Almaty oblysynyń Panfılov aýdanyndaǵy Penjim aýylynda sý tasqynynan eshqandaı úı apatty dep tanylǵan joq. Bul jóninde Panfılov aýdany ákiminiń baspasóz qyzmeti resmı málimdedi, dep habarlaıdy QazAqparat tilshisi.
«Arnaıy qurylǵan komıssııa anyqtaǵandaı, 181 úıdiń aýlasyn sý shaıyp, 31 úıdiń ishine sý kirgen. Ázirge apatty dep tanylǵan úı joq. Aýyl ishindegi aryqtar tolyq tazalanyp, buzylǵan kópir qalpyna keltirildi. Qazirgi ýaqytta 120 úıdiń aýlasy men 25 úıdiń ishi tolyq tazalandy. 370 tonnadaı qaldyq qoqystar shyǵaryldy»,-delingen vedomstvo taratqan aqparatta.
Ár úıdiń aýlasyna eki «KamAZ» shaǵyl tógilip, aýlalardy abattandyrý jumysy júrip jatyr. Jedel qurylǵan komıssııa materıaldyq shyǵyndardy esepteý ústinde. Shyǵyndar tolyq eseptelgen soń komıssııa sheshimimen ákimshilik tarapynan qajetti kómek kósetiletin bolady.
Oǵan deıin aýdan ákimi Temirlan Bektasovtyń uıymdastyrýymen kásipkerler aýyl turǵyndaryna kómek kórsetýdi bastady. Árbir kásipker úılerdiń jaǵdaıyna qaraı qurylys materıaldaryna kómek kórsetetinin jetkizdi.
«Sondaı-aq, kásipkerler qulaǵan saraı, qora syndy aýlalardaǵy qajetti qurylys jumystaryna kómek jasamaq. Aýyldaǵy eki kásipker birlesip, turmysy tómen 20 otbasyǵa 50 000 teńge kóleminde qarjylaı qoldaý kórsetetinin aıtty. Basqa da turǵyndar azyq-túlik, turmystyq qajetti zattarmen kómektesýde. Sonymen qatar, «Qyzyl aı» qoǵamy 181 otbasyna 30 000 teńgeden kómek kórsetetinin habarlady»,- dep málimdedi Panfılov aýdany ákiminiń baspasóz qyzmetinen.
Aıta keteıik, bul másele oblys ákimi Amandyq Batalovtyń qatań baqylaýynda.
Esterińizge sala keteıik, 3 maýsym kúni keshki saǵat 20:30 shamasynda nóser jaýyn saldarynan Almaty oblysynyń Panfılov aýdanyndaǵy Penjim aýylyn sý basyp qalǵan bolatyn. 
