Sel saldarymen kúreste Maqtaaral tájirıbesin paıdalanamyz - Ómirzaq Shókeev
TÓLEBI. QazAqparat – Túrkistan oblysynda nóser jaýynnan úıi búlingen azamattardyń shyǵyny arnaıy saraptaý komıssııasynyń sheshimimen anyqtalady. Bul týraly búgin aımaq basshysy Ómirzaq Shókeev tótenshe jaǵdaı jónindegi shtab otyrysynda málimdedi, dep habarlaıdy QazAqparat tilshisi.
Óńir basshysynyń sózinshe, qazirgi tańda jaramsyz bolǵan úıler men jóndeýdi qajet etetin baspanalardy qaıta qalpyna keltirý máseleleri qarastyrylýda.
«Jergilikti deńgeıdegi tótenshe jaǵdaıdyń saldaryn óz kúshimizben joıamyz. Oǵan tájirıbemiz jetkilikti. Sel saldarymen kúreste Maqtaaral tájirıbesin paıdalanamyz. Sý shaıǵan aýmaqtar sektorǵa bólingen. Olarǵa kómekke kelgen ózge aýdan basshylary jaýapty. El bolyp jumylyp, tótenshe jaǵdaıdy eńserýge barlyq múmkinshilik bar», – dedi Ómirzaq Shókeev shtab otyrysynda.
Aıta keteıik, keshe keshkisin Túrkistan oblysynyń taýly aýdandarynda nóser jaýyn saldarynan birneshe aýdandy sý shaıǵan bolatyn. Tólebı, Qazyǵurt, Báıdibek aýdandarynda jalpy sany 522 úıdiń aýlasyn sý shaıyp, 4 úıdi sý basqan.
Tótenshe jaǵdaı oryn alǵan aýdannan 258 adam evakýtsııalandy. Sý tasqyny zardabyn joıýǵa 612 maman, 84 tehnıka jáne 47 motopompa jumyldyryldy.
