Sel saldarynan «Saryózek – Kóktal» avtojolynyń bir bóligi zaqymdandy
ASTANA.KAZINFORM - Jetisý oblysynyń Panfılov aýdanynda jaýǵan mol jaýyn-shashyn saldarynan respýblıkalyq mańyzy bar KZ19-01 «Saryózek – Kóktal» avtomobıl jolynyń jekelegen ýchaskelerinde laı-tas aralas qarqyndy sý aǵyny qalyptasty. Bul týraly QazAvtoJol habarlady.
Tabıǵı qubylystyń eń eleýli saldary joldyń 152-shaqyrymynda tirkeldi. Sel aǵyny jol jıegi men jer tóseminiń bir bóligin topyraq negizine deıin shaıyp ketken. Sonyń saldarynan joldyń oń jaq jolaǵynyń bir bóligi opyrylyp, jol tósemi zaqymdandy.
Tabıǵı qubylystyń saldaryn joıýǵa JPB-90 jáne JPB-18 kúshteri jumyldyryldy. Avarııalyq-qalpyna keltirý jumystaryna barlyǵy 18 qyzmetker men 13 birlik arnaıy tehnıka, onyń ishinde KamAZ kólikteri men tıegishter, frontaldy tıegishter, MTZ traktorlary jáne býldozer tartyldy.
Qazirgi ýaqytta jol qyzmetteri júrý bóligin laı-tas shógindilerinen tazartýda. Sonymen qatar shaıylǵan jer tósemin nyǵaıtý jáne joldyń zaqymdanǵan bóliginiń turaqtylyǵyn qalpyna keltirý boıynsha kezek kúttirmeıtin jumystar júrgizilip jatyr.
Qozǵalys qaýipsizdigin qamtamasyz etý maqsatynda zaqymdanǵan ýchaske qorshalyp, ýaqytsha jol belgileri men baǵyttaýshy qurylǵylar ornatyldy.
Avtojol tolyq jabylǵan joq. Kólik qozǵalysy joldyń saqtalǵan jolaǵy arqyly kezekpen, reversıvti rejımde uıymdastyrylǵan. Oqıǵa ornynda patrýldik polıtsııa qyzmetkerleriniń kezekshiligi uıymdastyryldy. Avarııalyq-qalpyna keltirý jáne nyǵaıtý jumystary jalǵasyp jatyr.
Ýchaskedegi jaǵdaı jol qyzmetteriniń turaqty baqylaýynda.
Aıta keteıik, elimizde joldardyń jaǵdaıyn JI boljap otyratyn bolady.
