Sel saldarynan Qyrǵyzstannyń úsh oblysynda tótenshe jaǵdaı rejımi engizildi

BІShKEK.KAZINFORM — Sel saldarynan Qyrǵyzstannyń úsh oblysynda tótenshe jaǵdaı rejımi engizildi. Bul týraly Bishkekte ótken brıfıngte eldiń Tótenshe jaǵdaılar mınıstrligi basshysynyń orynbasary Ýrmatbek Shamyrqanov málimdedi, dep jazady Sınhýa agenttigi.

Ol Osh, Jalal-Abad jáne Talas oblystarynda tótenshe jaǵdaı engizilgenin habarlady.

Aıtýynsha, 20 sáýirden beri respýblıkada tolassyz jaýǵan jańbyr saldarynan 50-ge jýyq sel bolǵan. 200-den astam turǵyn úı men 300 aýla, birneshe mektep pen áleýmettik nysan sý astynda qaldy. Laı aǵyndary joldar men kópirlerdi basyp qaldy.

Buǵan deıin Tótenshe jaǵdaılar mınıstrligi Jalal-Abad oblysynyń Nooken aýdanynda selge qarsy bógetti sý jaryp ótip, 300 úıdiń turǵyndary qaýipsiz jerge kóshirilgenin habarlaǵan bolatyn. Osh oblysynyń Qara-Qulja aýdanynda sel kólikti alyp ketip, ishindegi adam qaza tapty.

Seısenbi kúni Qyrǵyzstan prezıdentiniń baspasóz hatshysy Asqat Alagózov selden zardap shekkenderge kómek kórsetiletinin aıtty.