Sel qaýpiniń aldyn alý: 170-ten astam tekserý júrgizildi
ASTANA. KAZINFORM — Sel qaýpi bar kezeńge daıyndyq aıasynda Qazaqstan TJM «Qazseldenqorǵaý» elimizdiń óńirlerinde sel qaýpin baqylaý jáne onyń aldyn alý boıynsha keshendi is-sharalar júrgizip jatyr. Bul týraly vedomstvonyń baspasóz qyzmeti málim etti.
Mınıstrliktiń málimetinshe, úzdiksiz monıtorıngti qamtamasyz etý maqsatynda aǵymdaǵy maýsymda 79 turaqty jáne 49 maýsymdyq baqylaý beketi jumysqa tartylǵan. Yqtımal tótenshe jaǵdaılar kezinde jedel áreket etý úshin «Qazseldenqorǵaý» mekemesiniń 11 avarııalyq-mehanıkalandyrylǵan brıgadasy jasaqtalǵan.
— Jyl basynan beri mekeme mamandary sel qaýpi joǵary ýchaskelerde 170-ten astam jerústi zertteý jumystaryn júrgizdi. Budan bólek, sel túzilý oshaqtary men yqtımal qaýipti nysandardyń jaǵdaıyn baǵalaý maqsatynda Almaty qalasy men Túrkistan oblysynda eki ret áýeden sholý tekserýi ótkizildi, — delingen habarlamada.
Profılaktıkalyq jumystyń mańyzdy baǵyttarynyń biri — halyqty jáne jergilikti atqarýshy organdardy aqparattandyrý. Maýsym bastalǵaly beri yqtımal qaýipti aımaqtarda ornalasqan eldi mekenderdiń turǵyndaryna, uıymdarǵa jáne ákimdikterge 800-ge jýyq usynymdyq habarlama joldandy.
Sonymen qatar, 2000-nan astam aqparattyq jadynama taratylyp, qaýipti ýchaskelerde shamamen 130 eskertý taqtaıshalary ornatyldy.
— Maýsym aıynda Іle Alataýy jotasynyń ortalyq bóligindegi muzdyq kólderdi, muzdyqtardy jáne sel qalyptastyrýshy oshaqtardy, sondaı-aq Jambyl, Túrkistan oblystarynyń, Jetisý jáne Shyǵys Qazaqstan oblystarynyń taýly aýdandaryn aerovızýaldy tekserý josparlanǵan, — dep jazdy vedomstvodan.
Aǵymdaǵy maýsymda Almaty qalasy, Almaty oblysy jáne Jetisý oblysy aýmaǵynda ornalasqan muzdyq kólderdi bosatý boıynsha aldyn alý jumystary júrgiziledi. Bul is-sharalar yqtımal qaýip-qaterlerdi der kezinde anyqtaýǵa jáne halyqtyń qaýipsizdigin qamtamasyz etýge baǵyttalǵan.
Aıta keteıik, TJM ulttyq parkterdegi órtti arnaıy kameralar arqyly baqylamaq.
