Sel qaýpi bar: Almaty qutqarýshylary taýly aımaqqa barmaýǵa shaqyrdy
ALMATY. KAZINFORM — Almaty qalasynyń tótenshe jaǵdaılar departamenti qala turǵyndary men qonaqtaryna úndeý jasady.
«Qazgıdromettiń» 1 shildedegi daýyldy eskertýine sáıkes, qatty jaýyn-shashynǵa baılanysty Almaty taýlaryndaǵy Kishi Almaty ózeni alqabynda sel júrý qaýpi bar. Sondyqtan qalalyq TJD aýa raıy turaqtalǵanǵa deıin Іle Alataýyna barýdan ýaqytsha bas tartýǵa shaqyrdy.
Sel qaýpi bar aımaqta kelesi qaýipsizdik erejelerin saqtaý qajet:
* taýdaǵy jaǵdaı týraly resmı aqparattardy únemi baqylaý;
* sel qaýpi tóngen nemese sel bastalǵan jaǵdaıda dereý bıik jerge kóterilý;
* ózen arnalarynyń, sel júrýi múmkin saılardyń, kól bógetteriniń ústinde jáne tómengi jaǵynda shatyr tikpeý;
* taýdyń joǵarǵy bóliginde nóser jaýyn jaýyp jatsa, ózen arnasynan jáne qaýipti aımaqtan dereý ketý kerek.
Eske salaıyq, buǵan deıin Almaty polıtsııasy eki dóńgelekti elektr kólik ıelerine úndeý jasady.
