Sektor Gazadaǵy shabýyldardan qaza tapqandar sany 70 myńnan asty
ASTANA. KAZINFORM – Sońǵy 48 saǵat ishinde Izraıl armııasynyń Sektor Gazaǵa jasaǵan shabýyldary saldarynan qaza tapqandar sany 13 adamǵa artyp, 70 925 adamǵa jetti, dep habarlaıdy Anadoly.
Bul týraly Gazanyń Densaýlyq saqtaý mınıstrliginiń habarlamasynda aıtylǵan. Habarlamada qaza tapqandar men jaralanǵandar, sondaı-aq qırandylar astynan shyǵarylǵan máıitter týraly tolyq aqparat berilgen.
Habarlamaǵa sáıkes, sońǵy 48 saǵat ishinde óńir aýrýhanalaryna 13 qaza tapqan adamnyń denesi jetkizilgen, olardyń 7-si qırandylar astynan shyǵarylǵan. Sonymen qatar, aýrýhanalarǵa 20 jaralanǵan adam túsken.
Soqqynyń toqtatylý rejımi engizilgen sátten beri Gazada 401 adam qaza taýyp, 1108 palestınalyq jaralanǵan, al qırandylar astynan 641 adamnyń denesi shyǵarylǵan.
2023 jylǵy qazan aıynan bastap Izraıldiń Gaza sektoryna jasaǵan shabýyly saldarynan jalpy qaza tapqandar sany 70 925-ke, al jaralanǵandar sany 171 185-ke jetti.
AQSh prezıdenti Donald Tramp 9 qazanda Izraıl men HAMAS Mysyrda júrgizilgen kelissózder barysynda Gazada atysty toqtatý josparynyń birinshi kezeńin maquldaǵanyn jarııalady.
Mysyrda qol qoıylǵan kelisim Izraıl úkimetiniń maquldaýymen 10 qazanda kúshine endi.
Degenmen, Izraıl armııasy Gazadaǵy atysty toqtatý týraly kelisimge qaramastan, túrli syltaýlarmen palestınalyqtarǵa shabýyldaryn jalǵastyryp jatyr.
Aıta ketelik Izraıl deldaldardyń bitimgerlik kúsh-jigeri aıasynda Gaza sektoryna soqqy jasaǵany týraly jazǵan edik.