Sekseýildi kesýge moratorıı 5 jylǵa uzartyldy
ASTANA. QazAqparat - Qazaqstanda sekseýil kesýge tyıym salý merzimi taǵy 5 jylǵa uzartyldy, dep habarlaıdy QazAqparat «Habar 24» telearnasyna silteme jasap.
Buǵan deıin mundaı shekteý elimizdiń orman sharýashylyǵy jáne janýarlar dúnıesi komıtetiniń buıryǵy negizinde 2015 jyldan 2018 jyldyń 31 jeltoqsanyna deıin engizilgen bolatyn.
Atap ótilgendeı, tabıǵatty qorǵaýǵa baǵyttalǵan osyndaı sharalar negizinde Qazaqstanda sekseýil plantatsııalarynyń kólemin arttyrý múmkin boldy.
Búginde Syr óńirindegi ormandy jerlerdiń 87 paıyzynda shólge shydamdy aǵashtyń osy túri ósedi. Aıta keteıik, «Ormandardy saqtaý jáne respýblıkanyń ormandy jerlerin kóbeıtý» jobasy aıasynda 2008-2014 jyldar aralyǵynda Aral teńiziniń qurǵaǵan ultanyna 57 myń gektardan astam sekseýil, sarsazan tárizdi, shólge, sortań topyraqqa beıimdi aǵash-buta túrleri otyrǵyzyldy. Bıyl taǵy 10 myń gektar teńiz ultanyna sekseýil egilmek.
«2018 jyly osy kúnge deıin sekseýil plantatsııalaryn zańsyz kesýdiń 49 deregi tirkeldi. 10 azamatqa aıyppuldar salyndy, úsh adam 200 saǵattyq qoǵamdyq jumysqa tartyldy. Taǵy eki adam bir jylǵa deıin bas bostandyǵynan aıyryldy. 25 sottalýshy tabıǵatqa keltirgen shyǵyndy ótegennen keıin sot sheshimimen qylmystyq jaýapkershilikten bosatyldy», - dedi oblystyq Orman sharýashylyǵy jáne janýarlar dúnıesi aýmaqtyq ınspektsııasynyń bas mamany Aıbek Jolaqanov.
