Sekseýil saýdasyna shekteý qoıylsa, ońtústiktiń shalǵaı aýyldary qınalyp qalmaı ma

ASTANA. QazAqparat - QR Aýyl sharýashylyǵy mınıstri Asqar Myrzaxmetovtyń aıtýynsha, búginde sekseýil aǵashtaryn kesýge tyıym salynǵan. Alaıda onyń saýdasy tolastamaı tur, dep xabarlaıdy QazAqparat tilshisi.

«Búginde moratorıı jarııalanǵanmen sekseýil saýdasy júrip tur. Onyń birden-bir sebebi - tabıǵı qaldyqtardy jınaýǵa shekteýdiń bolmaýy. Endigi jerde osy tabıǵı qaldyqtardy da paıdalanýǵa shekteý qoıý týraly sheshim qabyldandy. Oǵan qosa, qazirgi kezde biz saýda oryndaryda sekseýildi satýǵa tyıym salý máselesin kóterip otyrmyz», - dedi A.Myrzaxmetov bıoalýandylyqty saqtaý máselesi boıynsha ótken qoǵamdyq tyńdaýlarda.

Osy oraıda senator Bekmyrza Elamanov sekseýildiń qaldyqtaryna deıin shekteý qoıylsa, shalǵaı aýyldardyń jaǵdaıyn qıyndap ketpeı me dep, óz alańdaýshylyǵyn bildirdi.

«Jańa mınıstr myrza óziniń baıandamasynda aldaǵy jyldan bastap sol sekseýil alqaptarynda qaldyqtardy alǵany úshin de jaýapkershilik qaralatynyn eskertip ketti. Bizde Qyzylqum aýdanynda shalǵaı ornalasqan eldi mekender bar. Kóbisi mal sharýashylyǵymen aınalysady. Mysaly, Qyzylorda oblysynda Shopanqazǵan, Munaraly, Kekirel degen mekender bar. Aýdan ortalyǵynan 300-350 shaqyrym jerde. Jol qatynastary nashar. Olardyń qystygúni aýdan ortalyǵynan otyn tasýy múmkin emes. Osyǵan baılanysty bir suraǵym bar, atalǵan eldi mekenderdiń jeke turmystyq qajettilikterine paıdalanatyn qaldyqtarǵa bir jeńildik jasaýǵa bola ma?», - dep surady senator.

Onyń saýalyna Aýyl sharýashylyǵy vıtse-mınıstri Erlan Nysanbaev jaýap berdi. «Bul máseleniń bári qarastyrylǵan. Búgingi tańda biz oblys ákimshilikterimen mynandaı sheshimge keldik. Árbir otbasyǵa 4 tekshe metr kóleminde sekseýildiń normasy bekitilgen. Sonyń barlyǵyn tek orman sharýashylyq mekemeleri ǵana daıarlaıdy. Olar otyndy óz qoımalarynda saqtap, aýyl adamdaryna taratatyn bolady», - dep atap kórsetti E.Nysanbaev.