Seksennen asqan keıýana eshki baǵyp, sútinen qurt-irimshik jasaıdy
QOSTANAI. QazAqparat - Seksen jastaǵy qostanaılyq Sáýlıma Ahmetova mal baǵyp, bala-shaǵasyn et-sútpen qamtamasyz etip júr, dep habarlaıdy QazAqparat tilshisi.
Zeınetker Sáýlıma Ahmetova ala jazdaı sút, aıran, qurt-irimshik izdep, dúken aralap kórgen emes. Samaıyn áldeqashan aqqyraý shalǵan qarııa áli tyń, qımyly shıraq. Eshki baǵyp, sútin saýady. Aýlasynda shaǵyn qorasy bar. Ata kásippen shuǵyldanyp kele jatqan ol byltyr seksen jasqa toldy.
«Qolymdaǵy on-on bes shaqty eshkim jyl on eki aı ermek. Jazda qaımaq-maı úzilgen emes. Qysta jyly qorada ustap, jem-sýyn ýaqytyly berip otyramyn. Bir jaǵynan, qımyl-qozǵalyssyz otyra almaımyn. Qalanyń shet jaǵynda turǵandyqtan, kók shyǵa sala eshkilerdi bir mezgil syrtqa baǵyp kelemin. Mal jaıyp júrip, kórshilerimdi kóremin. Áńgimelesip, ýaqyttyń qalaı ótkenin bilmeı qalasyń», - deıdi keıýana.
Bul kisi ár eshkiniń jaıyn jaqsy biledi. Birine tátti usynyp, endi birine óz qolymen nan berýi -kúndegi ádeti. Aýyldan kósher kezde eshkilerin ózimen kirge ala kelipti. Qazir túlikter túgel laqtady.
«Osy jasqa kelip, shıraq júrýim tynymsyz eńbek, taza taǵamnyń arqasy. Jumystyń jamany joq. Adam kez kelgen jumysty bastarda bar yntasymen kirisýi kerek. Qalada turyp ta mal ustaýǵa bolady. Bir jaǵynan, eshki maly ósimtal, tez kóbeıedi. Kúnine eki ret saýyp alamyn. Olardyń árqaısysy 1,5-2 lıtrden sút bergenniń ózinde kúnine 1 shelek shyǵady. Eshki súti jeńsik as, onyń emdik qasıeti de mol», - deıdi Sáýlıma ájeı.
Mamandardyń sózinshe, eshki súti - A, S, V, D, E dárýmenderi men basqa da mıkroelementter qorynyń qaınar kózi bolǵandyqtan adam aǵzasyna óte paıdaly ónim.
«Bul úı janýarynyń sútin súıegi synǵan adamdar kúnine 1 staqannan iship tursa, synyǵy bitip, qalpyna kelý protsesi 2 ese jyldam bolady. Eshki sútinde allergııalyq reaktsııalar týdyratyn aqýyz joq. Sondyqtan allergııasy bar balalarǵa eshki súti taptyrmas em. Ásirese, asqazan aýrýlaryna, anemııaǵa, kózdiń nashar kórýine, dıatezge paıdasy mol», - deıdi oblysqa tanymal ardager-dáriger Muhtar Bóribaev.
Seksennen asqan Sáýlıma Ahmetova keıingi býyn ata kásipten qol úzip qalmasa eken dep tileıdi. Sol úshin de balalary qalaǵa kóshirip ákelý jaıly aıtqanda: «Mal ustaıtyn qora-jaı bolsa ǵana baramyn», - dep talap qoıypty.
Qazir ol bir ózi úsh otbasyn qunarly, tabıǵı taǵammen qamtıdy. Artylǵany - kórshi-qolańnyń nesibesi. Sáýlıma ájeı adal eńbek túpki maqsatqa jetkizetindigin keıingi urpaqtaryna udaıy aıtyp otyrady.
