Sekirgenderde basqa amal bolǵan joq - Órtengen úıdiń turǵyndary keshe ne kórgenin aıtyp berdi
29 jastaǵy Tileýjan Ahmetqan órt kezinde tek ózin ǵana emes, kórshilerin de oılaǵan.
Ol aldymen páterden áıeli men balalaryn shyǵaryp, keıin kórshilerine kómekke barǵan.
«Ekinshi qabatta turamyn. Eń aldymen páterde kúıiktiń ıisin sezdim, keıin kireberisten qara tútindi kórdim. Birden balalarym men áıelimdi syrtqa shyǵardym, keıin basqalarǵa da kómektesemin dep sheshtim. Eshteńe oılaǵan joqpyn, qorqynysh sezimi de bolǵan joq. Kórshilerdiń demalý úshin terezeden basyn shyǵaryp turǵanyn kórdim, jylaǵan balalardyń daýysyn estidim. Oǵan shydap tura almadym. Joǵarǵy qabattan turǵyndardy qutqarý úshin podezge qaıta júgirdim. Qara tútinnen eshteńe kórinbedi, biraq kórshilerimniń páterine kirip, baspaldaqpen birneshe adamdy syrtqa shyǵardym, aýzym men murnymdy jaýyp aldym. Qazir kórshiler meniń 20-ǵa jýyq turǵyndy shyǵarǵanymdy aıtady, onyń kópshiligi - balalar», - deıdi Tileýjan.
Ol sondaı-aq jaqsy kórshiden aıyrylyp qalǵanyn aıtty.
«Áseldi tanıtynmyn. Óte meıirimdi, kómektesýge daıyn turatyn elgezek qyz edi. Onyń apaıy qazir aýrýhanada jatyr. Ol da jaqsy adam. Áselge kómektese almaǵanyma ókinemin. Qazir basqa zardap shekken turǵyndar úshin duǵadamyz, olardyń tez saýyǵyp ketýin tileımin», - dedi Tileýjan Ahmetqan.
Jasulan esimdi turǵyn da órt kezindegi is-áreketi jaıynda aıtyp berdi. Ol úıdiń 16-qabatynda turady.
«Basynda ne bolyp jatqanyn túsinbedim. Páterde tútinniń ıisi sezildi. Podezge shyǵyp qarasam kók tútin eken. Azdap úreılendim. Balalarym tútin ıisinen ýlanyp qala ma dep qoryqtym. Sosyn búkil esikterdi dymqyl oramalmen jaýyp, balalardy balkondaǵy órt sóndirý baspaldaǵy arqyly tómen túsiremin dep sheshtim. 15-shi qabatqa túskende 14-shi qabattyń lıýgin ashqym keldi. Biraq ol sym temirmen baılanǵan eken. Ony julyp alyp, ary qaraı tómenge tústim. 13-shi qabatqa jetkende kúshim azaıdy. Ol jerde jótelip turǵan balaly áıeldi kórdim. Ary qaraı jol bolmaǵan soń óz páterimizge qaıta kóterildik. Kilemge sý tógip otyrdyq. Tipti balalardy ishine otyrǵyzaıyn dep tońazytqyshtyń ishin bosatyp qoıdym. Keıin qutqarýshylar keldi. Allaǵa shúkir, aman qaldyq», - deıdi Jasulan.
Úıdiń basqa turǵyndary 14-shi qabattan joǵaryda turatyn adamdarǵa úıdiń janynda qurylys salyp jatqan túrik azamattary terezeden shyǵýǵa kómekteskenin aıtty.
Olar óz tehnıkasymen kelip, birneshe balany shyǵarýǵa kómektesken.
Sondaı-aq emhanada terapevt dáriger bolyp isteıtin Jaqsylyq Raýan da kórshilerine kómekke kelgen.
Ol otbasymen birge tómen túsken, sosyn zardap shekkenderge kómekke asyqqan.
«14-shi qabatta turam. Úıge kelgen soń tútinniń ıisin sezdim. Saǵat 17:10-da lıftimen páterime kóterildim, ol kezde áli eshteńe joq edi. Páterimniń esigin ashyp jatqan kezde lıft toqtap qaldy. Sosyn tútinniń ıisin sezdim. Úıge kirip, eki balam men áıelimdi alyp baspaldaqpen tómen tústik. Qara tútin boldy, eshteńe kórinbedi. Biraq, kóshege shyǵa aldyq. Keıin basqa adamdarmen birge 6-7 qabattan sekirgeli jatqan adamdarǵa kómektese bastadym. Olardy bıikten sekirmeýge shaqyrdyq, biraq olar bizdi tyńdamady. Olar tipti qara jerge sekirýge daıyn edi. Sol úshin birinshi qabattaǵy páterlerden kilem shyǵaryp, jaıyp, olardy tosyp alýǵa daıyndaldyq. Bir áıel sekirdi. Ol kisiniń salmaǵy aýyrlaý edi. Jerge túskende jambasy synyp ketkendeı boldy. Ol kisini jedel járdem kóligine salyp jiberdik. Ekinshi áıel altynshy qabattan sekirdi. Ol kisi sekirgen kezde aıaǵy terezege ilinip baryp qulady. Ol kisini birden jedel járdem alyp ketti. Qazir jaǵdaıy qandaı ekenin bilmeımin. Men shamamen 4 adamǵa kómek kórsetippin», - dedi Jaqsylyq Raýan.
Ol sondaı-aq turǵyndardyń nelikten terezeden sekirýge barǵany jaıly pikir bildirdi.
«Menińshe, olarda basqa tańdaý bolǵan joq. Tómende turyp páterlerdi qara tútin basqanyn kórdim, demalatyn taza aýa bolǵan joq. Budan basqa jol bolsa, eshkim 6-7 qabattan sekirmes edi», - dedi ol.
Laýra esimdi turǵyn joldasymen birge 4 aılyq sábıin qalaı qutqaryp qalǵanyn aıtty.
Aıtýynsha, ul balany oıynshyq sebetke jatqyzyp, ony avtokólikke arnalǵan trossqa baılap, 5-qabattyń terezesinen tómen túsirgen.
«5 pen 6-shy qabattyń arasynda qara tútin boldy. 5-shi qabatta turǵan soń ony jaqsy sezdim. Qatty shoshydym. Ol kúni joldasymnyń jumystan erte kelgeni jaqsy boldy. Kóshege shyqqaly jatqanbyz, biraq sál kidirdik. Onymyz durys bolǵan sekildi, sebebi lıftide turyp qalýymyz múmkin edi. Ol kezde ne bolaryn elestete almaımyn. 4 aılyq balamyzdy oıynshyq sebetke otyrǵyzyp, ony avtokólikke arnalǵan trossqa baılap, balkonnan tómen qaraı túsirdik. Tómende adamdar sebetti tosyp aldy. Sosyn men kórshi úıde turatyn qurbyma qońyraý soǵyp, balama qaraı turýyn suradym. Ózimiz úıden shyǵýǵa tyrystyq. Balamdy ýaıymdadym. Aýyz, murnymyzdy dymqyl oramalmen jaýyp aldyq, kórshiler, odan soń qutqarýshylar bizge kómekke keldi. Bárimiz avtobaspaldaq arqyly tómen tústik. Esimnen tanyp qala jazdadym, tómen túsken kezde áreń qozǵaldym. Qudaıǵa shúkir, bárimiz aman-esen tústik», - dedi Laýra.
Aıtat keteıik, atalǵan 16 qabatty úıdiń turǵyndary - jumys isteıtin jastarǵa satyp alý quqyǵynsyz jalǵa beriletin baspana baǵdarlamasymen páter alǵan jas otbasylar.
Baǵdarlama boıynsha turǵyn úı tek 5 jylǵa beriledi.
Eske salaıyq, biz buǵan deıin Almatyda 16 qabatty úıde órt tutanǵanyn habarlaǵan edik.
Qyzyl jalyn saǵat 18:46 kezinde oqshaýlanyp, sóndirildi.
Amaly qalmaǵan turǵyndar balalaryn terezeden laqtyrdy. Zardap shekkenderdiń ishinde 2 júkti áıel bar.
Keıin Almaty qalalyq densaýlyq saqtaý basqarmasy bir adamnyń qaza tapqanyn habarlady.
Órtten zardap shekken turǵyndar tamaq jáne jatyn orynmen qamtamasyz etildi.
Marqum Ásel Bekmuhametovanyń otbasyna qajetti kómek kórsetiledi. Jerleý rásimi Almaty oblysy Eńbekshiqazaq aýdany Qarajota aýylynda ótedi.
«Aqkent» turǵyn úı keshenin salýshy kompanııa Ásel Bekmuhambetovanyń otbasyna eki bólmeli páter beretin boldy.
Osy órtke qatysty eki qylmystyq is qozǵaldy.
