Segizinshi saılanǵan QR Parlamentiniń tórtinshi sessııasy jabyldy
ASTANA. KAZINFORM — Segizinshi saılanǵan Qazaqstan Respýblıkasy Parlamentiniń tórtinshi sessııasy jabyldy. Bul týraly Parlament palatalarynyń birlesken otyrysynda Májilis tóraǵasy Erlan Qoshanov málim etti.
Aıta keteıik, búgin birlesken otyrysqa Memleket basshysy Qasym-Jomart Toqaev qatysyp, Parlament jumysyn qorytyndylady.
Ata zańnyń 94-babyna sáıkes, Respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady. Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Naqtyraq aıtqanda, jańa Konstıtýtsııanyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi. Birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaýǵa tıis
Budan buryn habarlanǵandaı, 26 maýsym kúni Májilis tóraǵasy Erlan Qoshanov VIII saılanǵan QR Parlamentiniń tórtinshi sessııasyndaǵy palatanyń jumysyn qorytyndylady.
Sonymen qatar 29 maýsymda Senat tóraǵasy Máýlen Áshimbaev palatanyń sońǵy jalpy otyrysyn ótkizdi.
Eske salsaq, bıyl 1 qyrkúıekten bastap jańa Parlament — Quryltaı óz jumysyna kirisedi.
