Segiz musylman eli Ulybrıtanııanyń Izraılge qarsy sanktsııasyn qoldady
ASTANA. KAZINFORM — Ulybrıtanııanyń Izraıl eldi mekenderinen keletin taýarlarǵa shekteý engizý týraly sheshimi halyqaralyq qoldaýǵa ıe boldy. Alaıda bul qadam Tel-Avıvtiń qarsylyǵyn týǵyzdy, dep habarlaıdy Kazinform agenttiginiń menshikti tilshisi.
Musylmandar basym turatyn segiz eldiń syrtqy ister mınıstrleri Ulybrıtanııanyń basyp alynǵan Palestına aýmaǵyndaǵy Izraıl eldi mekenderinen taýar ımporttaýǵa tyıym salý týraly sheshimin quptady.
Iordanııa, BAÁ, Indonezııa, Pákistan, Túrkııa, Saýd Arabııasy, Qatar jáne Mysyrdyń birlesken málimdemesi 9 qyrkúıekte jarııalandy.
Syrtqy saıasat vedomstvolarynyń basshylary Londonnyń bul sheshimi halyqaralyq qaýymdastyqty osyndaı sharalar qabyldaýǵa jáne zańsyz qonystandyrý qyzmetine qatysy bar uıymdar men jekelegen tulǵalardy jaýapkershilikke tartýǵa yntalandyrady dep úmittenip otyr.
Mınıstrler Batystyń 12 eliniń syrtqy ister mınıstrleri Batys jaǵalaýdaǵy jaǵdaıǵa baılanysty jasaǵan birlesken málimdemesin de qoldady.
Seısenbi kúni Kanada, Danııa, Fınlıandııa, Frantsııa, Islandııa, Irlandııa, Norvegııa, Polsha, Portýgalııa, Ispanııa, Shvetsııa jáne Ulybrıtanııa ókilderi Izraıl eldi mekenderinen keletin taýarlarǵa ulttyq deńgeıde shekteý engizýge nemese jalpy eýropalyq shekteýlerdi qoldaýǵa nıetti ekenin málimdedi. Sondaı-aq olar ózderiniń ishki rásimderine sáıkes osyndaı sharalardy qabyldaý múmkindigin qarastyratynyn aıtty.
Musylman jáne arab elderi halyqaralyq quqyq boıynsha zańsyz dep tanylǵan eldi mekenderden taýarlar saýdasyna óz shekteýlerin engizý nemese jalpy eýropalyq shekteýlerdi qoldaý nıetin rastady.
Segiz eldiń mınıstrleri Izraıldi eldi mekender salýǵa qatysty barlyq sharany, sondaı-aq okkýpatsııalanǵan Palestına aýmaqtarynyń geografııalyq jáne demografııalyq sıpatyn ózgertýge baǵyttalǵan áreketterdi toqtatýǵa taǵy da úndedi.
Málimdemede Gaza sektory Palestına aýmaǵynyń ajyramas bóligi ekeni de aıtyldy. Segiz el AQSh prezıdenti Donald Tramptyń beıbitshilik josparyn tolyq ári dereý júzege asyrýǵa, gýmanıtarlyq jaǵdaıdy jaqsartýǵa jáne anklavty qalpyna keltirýdi bastaýǵa úndedi.
Mınıstrler ádil ári turaqty beıbitshilikke jetýdiń jalǵyz joly retinde 1967 jylǵy 4 maýsymdaǵy shekaralar negizinde, astanasy Shyǵys Ierýsalım bolatyn táýelsiz ári aýmaqtyq tutastyǵy saqtalǵan Palestına memleketin qurýdy atady.
London Izraıl eldi mekenderine qatysty ustanymyn kúsheıtti
Ulybrıtanııa úkimeti 8 qyrkúıekte Iordan ózeniniń batys jaǵalaýyndaǵy Izraıl eldi mekenderinen taýar ımporttaýǵa tyıym salatynyn, sondaı-aq olarmen baılanysty qyzmetter kórsetýge shekteý qoıylatynyn málimdedi.
Ulybrıtanııanyń syrtqy ister mınıstri Ed Mılıbend bul sharalardy Londonnyń Palestına-Izraıl qaqtyǵysyna qatysty jańa ustanymynyń bastamasy dep atady.
Onyń aıtýynsha, budan bylaı Ulybrıtanııa saıasaty zań buzýshylyqtardy aıyptaýmen ǵana shektelmeı, naqty is-qımyldardy da qamtıdy.
Shekteýler eldi mekenderdi qurýǵa jáne keńeıtýge yqpal etetin qyzmet kórsetetin kompanııalar men jekelegen tulǵalarǵa qatysty bolady. Ulybrıtanııa sondaı-aq olardyń jarnamasyna tyıym salýdy josparlap otyr.
Jańa sharalar 6-9 aı aralyǵynda engiziledi dep josparlanyp otyr.
Bul sheshim Izraıldiń Ierýsalımniń shyǵysyndaǵy E-1 aımaǵynda shamamen 1 200 úı salý jospary aıasynda qabyldandy. Joba synshylarynyń pikirinshe, onyń júzege asýy Batys jaǵalaýdy soltústik jáne ońtústik bólikterge bólip, aýmaqtyq tutastyǵy saqtalǵan Palestına memleketin qurýdy qıyndatýy múmkin.
London 2016 jylǵy BUU Qaýipsizdik Keńesiniń 2334 qararyna jáne 2024 jylǵy 19 shildede Halyqaralyq sot shyǵarǵan konsýltatıvtik qorytyndyǵa silteme jasady.
Bul qujattar memleketterdi okkýpatsııa saldarynan qalyptasqan jaǵdaıdy zańdy dep moıyndamaýǵa jáne onyń saqtalýyna yqpal etpeýge mindetteıdi.
Izraıldiń jaýaby jáne konsýldyqtyń jabylýy
Izraıldiń syrtqy ister mınıstri Gıdeon Saar Ulybrıtanııa tarapynyń aıyptaýlaryn joqqa shyǵaryp, Ulybrıtanııanyń Shyǵys Ierýsalımdegi bas konsýldyǵyn jabatynyn málimdedi.
Bul dıplomatııalyq ókildik Londonnyń Shyǵys Ierýsalımdegi, Batys jaǵalaýdaǵy jáne Gaza sektoryndaǵy palestınalyqtarmen baılanysyna jaýap beredi.
— Ulybrıtanııa Izraıl týraly shekten shyqqan ótirik taratyp otyr. Jaýap retinde shara qabyldaýdan basqa amal qalmady, — dedi Saar.
Izraıl bıligi mıssııaǵa qyzmetin toqtatýdy talap etip, onyń dıplomatııalyq korpýsynyń akkredıtatsııasynan aıyrdy. Olarǵa elden shyǵý úshin 30 kún berildi.
Sonymen qatar Izraıl 11 brıtanııalyq parlament múshesine elge kirýge tyıym saldy. Olardy Izraılge qarsy áreket etti dep aıyptady.
Izraıl bıligi Batys jaǵalaýdy daýly aýmaq dep esepteıdi jáne ondaǵy eldi mekenderdiń barlyǵyn zańsyz dep moıyndamaıdy.
Álem elderiniń basym bóligi okkýpatsııalanǵan aýmaqta eldi mekender salýdy halyqaralyq quqyqty buzý dep esepteıdi.
Eske salaıyq, buǵan deıin Izraıl úkimetinde Gaza sektorynyń turǵyndaryn basqa jerge kóshirý máselesi áli de qyzý talqylanyp jatqanyn jazǵan edik.
Al Izraıl premer-mınıstri Bınıamın Netanıahý Sırııadaǵy Izraıl áskeri ornalasqan pozıtsııalarǵa baryp, Tegeranmen jalǵasyp jatqan teketireske qatysty málimdeme jasady. Netanıahý sapar kezinde Izraıldiń qazirgi Iran basshylyǵyn jeńýine az qalǵanyn aıtty.
