Segizaıaq Gollandııa quramasynyń 2010 jylǵy álem chempıonatynda jeńiske jetetinin boljap berdi
ASTANA. Shildeniń 8-i. QazAqparat - Nemistiń Oberhaýzeniniń akvaortalyǵyndaǵy búkil álemge tanymal Paýl esimdi segizaıaǵy Gollandııa quramasynyń álem chempıonatynda Ispanııaǵa qarsy fınaldyq matchynda jeńimpaz bolatynyn boljap berdi, dep habarlaıdy RBK.
Osyǵan deıin Paýl tańǵalarlyq naqtylyqpen Germanııa quramasynyń qatysýymen bolatyn barlyq matchtardyń nátıjelerin dop basyp boljap otyrdy, onyń ishinde Serbııa men Ispanııadan jeńiletini de bar.
Bir qyzyǵy, sońǵy kezderi segizaıaqtyń boljaýlary álemge áıgili bola bastady, osy sózimizge dálel retinde Anglııada dúnıege kelgen bylqyldaq deneli Paýldiń ÁM-2010 fınalısin tańdaý sharasyn tikeleı efırde bir mezette birneshe telearna kórsetti. Paýlge árqaısysynda quramalardyń jalaýlary bekitilgen eki jáshik tamaq beredi. Seısenbi kúni Paýl «ıspandyq» jáshikti unatty. Al endi segizaıaq gollandyqtardy tańdap otyr.
Sońǵy ret kóripkel-segizaıaq Eýro-2008-de qatelesti. Ispanııa men Germanııanyń fınaldyq básekesinde ol nemisterge jeńisti boljap bergen edi.
