Segiz óńirde energııaǵa tarıf arzandady
NUR-SULTAN. QazAqparat – Qazaqstanda jyl basynan elektr qýatyna tarıfter 1,5 paıyzǵa qymbattady. Degenmen, 8 óńirde baǵa kerisinshe, arzandaı túsken, dep habarlaıdy QazAqparat energyprom.kz saıtyna silteme jasap.
2020 jylǵy qańtar-sáýir aralyǵynda elde 37,5 mlrd kVt-saǵat elektr energııasy óndirildi. Kórsetkish jylyna 3 paıyzǵa artqan.
«Energetıkalyq kompanııalardaǵy kúrdeli qarjylyq jaǵdaı, jetildirilmegen tarıftik saıasat, ınvestıtsııalyq tartymdylyqtyń joqtyǵy iri kólemdi jobalardyń bolmaýyna alyp keldi. A qazirgi jaǵdaıda qarjylandyrý tek jabdyqtardyń jumysqa qabilettiligin saqtap otyrý úshin ǵana jetetin bolady», - delingen aqparatta.
Sarapshylardyń paıymynsha, saladaǵy problemalar saldarynan Qazaqstan jaqyn keleshekte elektr energııasyn kórshi elderden satyp alýy múmkin. Ázirge qazaqstandyq elektr stansalary (1-toqsanda) energııaǵa suranysty (eksport pen naryqta satý) 99 paıyzǵa qamtamasyz ete aldy. Import úlesi – 1 paıyz boldy. Bul rette, ımport bir jylda 17,9 paıyzǵa azaıǵan.
Bıylǵy jyldyń mamyr aıynda elektr energııasynyń baǵalary byltyrǵy jylmen salystyrǵanda 1,5 paıyzǵa qymbattady. Elektr energııasynyń tarıfteri Batys Qazaqstan oblysynda (16,3 paıyzǵa), Nur-Sultan (10 paıyzǵa) jáne Almaty qalalarynda (7,6 paıyzǵa) qymbattady.
Elimizdiń 17 óńiriniń 8-inde elektr qýatynyń baǵasy, kerisinshe arzandaǵan. Aqmola oblysynda baǵanyń 10,8 paıyzǵa arzandaýy tirkeldi.
