Segiz eldiń balýandary Tarazdaǵy týrnırge jınaldy
TARAZ. QazAqparat - Tarazda eresek balýandar arasynda memleket jáne qoǵam qaıratkeri Dinmuhamed Qonaevty eske alýǵa arnalǵan XI halyqaralyq týrnır ótedi, dep habarlaıdy QazAqparat tilshisi.
Jambyl oblystyq Dene shynyqtyrý jáne sport basqarmasynyń habarlaýynsha, dúbirli doda 23-25 qarasha kúnderi «Taraz-Arena» sport saraıynda ótedi. Saltanatty ashylý rásimi 24 qarashada bolady.
Sportshylar 10 salmaq sanatynda kúsh synasady.
2007 jyldan beri respýblıka deńgeıinde ótip kelgen týrnır 2012 jyly halyqaralyq mártebege ıe boldy. 2016 jyly Taraz Reseı, Mońǵolııa, Brazılııa, Armenııa, Grýzııa, Tájikstan, Qyrǵyzstan, Ózbekstan elderinen 150-den astam sportshyny qabyldaǵan bolsa, 2017 jyly Japonııa, Polsha, Ýkraına, Belarýs, Ázerbaıjan elderi de óz balýandaryn jiberdi.
Bıyl toǵyz komanda: Qazaqstan, Reseı, Ýkraına, Mońǵolııa, Grýzııa, Belarýs, Ázerbaıjan, Tájikstan, Qyrǵyzstan, Ózbekstan balýandary kúsh synasady.
Uıymdastyrýshylardyń aıtýynsha, týrnır Qazaqstanda erkin kúresti nasıhattaýǵa, jastardy otansúıgishtikke tárbıeleýge, QR Prezıdentiniń Qazaqstan halqyna Joldaýyn oryndaýǵa serpin berýdi maqsat etken.
Aıtýly sharany uıymdastyrýǵa: QR Grek-rım, erkin jáne áıelder kúresi federatsııasy, Jambyl oblystyq Dene shynyqtyrý jáne sport basqarmasy, Jambyl oblysynyń grek-rım, erkin jáne áıelder kúresi federatsııasy muryndyq bolyp otyr.
Týrnırdiń júlde qory 26 mln teńgege jýyq. I, II, III oryndardy alǵan sportshylarǵa medaldar, dıplomdar, demeýshilerdiń aqshalaı syılyqtary tabys etiledi. Birinshi orynǵa 4 myń dollar tigilgen.
Árbir salmaq sanatynda jeńiske jetken sportshylardyń bapkerlerine 500 dollar syıaqy beriledi.
