Şýchınskidegi kóshege Qanaı bı esimi berildi

ŞÝChINSK. QazAqparat - Aqmola oblysynyń Şýchınsk qalasynda Qanaı bı esimine kóshe berildi, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Kóshe ataýynyń berilýine Şýchınsk qalasynyń turǵyndary sonymen qatar, Qanaı bıdiń urpaqtary men mektep oqýshylary qatysty.

«Álemdegi eshbir halyqtyń, eshqandaı memlekettiń damý tarıhynda kezdespeıtin, tek qazaq ultynyń sanasynda saqtalyp, onyń qoǵamdyq ómirine minsiz qyzmet etken bıler soty, olar ustanǵan ádildik – bizdiń ónege alar, taýsylmas quqyqtyq baılyǵymyz. Sot bıliginiń qazaq qoǵamyndaǵy ereksheligi sonsha keıbir kezderi han bıligimen qatar keı kezderde joǵary bolǵan. Bı hannyń aqylgóı keńesshisi, rýhanı tiregi ári ustazy retinde bolǵan. Bı ár ýaqytta halyq atynan sóıledi jáne onyń janashyry bolyp sanalady» - dedi Aqmola oblystyq sotynyń tóraǵasy Dosjan Ámirov.

Oblystyq sottyń tóraǵasy sýdıalar qaýymdastyǵy men jergilikti atqarýshy organdardyń qazaq halqynyń bıleriniń esimderimen aýyl jáne kóshe ataýlaryn ózgertý boıynsha eńbekterin atap ótti.

«Atalǵan jumys Qazaqstan Respýblıkasy Joǵarǵy sotynyń basshylyǵymen Elbasynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalarynyń negizgi qaǵıdalaryn júzege asyrý maqsatynda júrgizilýde» - dep tolyqtyrdy D.Ámirov.

Aıta keteıik, Qanaı bı Quttymbetuly – sheshen, batyr, Abylaıhannyń bas keńesshisi. Aqmola oblysynyń Zerendi aýdanynda týǵan. XVIII ǵasyrlardaǵy orta júzdiń bedeldi kóshbasshysy, syrtqy jaýlarǵa qarsy ult-azattyq qozǵalystarǵa qatysýshy jáne uıymdastyrýshy, dańqty qolbasshy, qazaq jerin jońǵarlardan azat etýge úlken úles qosqan.