Şýchınskide joǵaryǵa ekstremaldy júgirýden halyqaralyq jarys ótip jatyr
NUR-SULTAN. QazAqparat - Şýchınskidegi shańǵy bazasynda «RED BULL 400» uranymen júgirýden halyqaralyq jarys bastaldy, dep habarlaıdy QazAqparat tilshisi.
«Şýchınskide «Rull bull 400» bıikke ekstremaldy júgirý jarysy alǵash ret uıymdastyrylyp otyr. Al jalpy elimizde osymen 4-shi ret ótip jatyr. Buǵan deıin Almaty da ótkizilip keldi. Bul halyqaralyq deńgeıdegi jarys sondyqtan, kóptegen álem elderinde joǵary qarqynmen ótedi. Alǵash bastaýyn 2004 jyly Avstrııadan aldy. Jarys qatysýshylary tramplın arqyly 400 metr joǵaryǵa qaraı júgiredi. Ereje boıynsha ekstremaldy júgirýdiń eki túri bolady: jeke jáne toptyq quramda qatysý. Ár komandada 4 adamnan bolady» - dedi atalǵan halyqaralyq ekstremaldy júgirý jarysynyń bas tóreshisi Tımýr Artıýhın.
Onyń málimdeýinshe, júgirý jarysyna 300-ge jýyq adam qatysýda.
«Eń kóp qatysýshy árıne óz elimizden 250-ge jýyq adam. Sondaı-aq, Reseıden 7-eý, AQSh-tan -2 adam, Ázerbaıjan, Qyrǵyzstan jáne Chehııadan 1 qatysýshydan. Onyń 200-den astamy er adam, qalǵany áıelder. Sol sııaqty atalmysh sharaǵa qatysqysy keletinder sanynyń jyl sanap artyp kele jatqanyn da aıtyp ótken jón. Alǵash Almatyda uıymdastyrylǵanda 200-deı adam qatyssa, bıyl 700-den astam almatylyq qatysty. Jarysqa 18 jastan joǵary qaraı kez kelgen adam qatysyp, baǵyn synaı alady», - dedi ol.
Uıymdastyrýshylardyń habarlaýynsha, jarystyń qorytyndysy boıynsha jeńimpazdarǵa qarjylaı syıaqy beriledi.
Atap aıtqanda, 1 orynǵa 300 myń teńge, 2 orynǵa 200 myń teńge jáne tıisinshe 3 orynǵa 100 myń teńge tabys etiledi. Odan bólek, árbir qatysýshyǵa medal beriledi.
