Şýchınskide qys ortasynda jylý qazandyǵy isten shyqty

ASTANA. QazAqparat - Qazir búlingen qazandyq qosylǵan turǵyn úılerge jylý berýdi qalpyna keltirý sharalary jasalýda, dep habarlaıdy QazAqparat Aqmola oblysy ákiminiń baspasóz qyzmetine silteme jasap.

Árqaısysynyń qýaty 0,5 MVt bolatyn 4 elektr qazandyǵy ornatylyp jatyr. Qurylǵylardy ornatyp, jylýdy qalpyna keltirý úshin oǵan arnaıy ǵımarat daıyndaldy. Buǵan jumsalǵan qarajatty  qazandyqtyń ıesi  «Kókshetaý Energo» JShS shyǵardy.

Aıta keterligi, qazandyq vedomstvolyq eki qos qabatty úı men úsh jekemenshik qospáterli úıdi jylytyp turǵan bolatyn. Munda barlyǵy 71 adam turady.

Eske sala keteıik, 2017 jyldyń 27 jeltoqsan kúni saǵat 12.50 shamasynda Şýchınsk qalasyndaǵy jylytý qazandyqtarynyń birinde apat boldy. Oqıǵa ornyna jedel jetken Aqmola oblysy ákiminiń orynbasary Vasılıı Krylov Býrabaı aýdanyndaǵy tótenshe oqıǵa boıynsha jedel komıssııa otyrysyn ótkizdi. Atalǵan aýdanda jylytý pýnktteri jasaqtalyp, turǵyndar páterlerinen ýaqytsha osy jerge keldi.