Şýchınskide áskerıler arasynda shańǵydan el chempıonaty ótti
ASTANA. QazAqparat - Shańǵy jarysynan áskerı sportshylar arasynda el chempıonatynyń úzdikteri anyqtaldy, dep habarlaıdy QazAqparat tilshisi QR Qorǵanys mınıstrligi Armııa ortalyq sport klýby-sport komıtetine silteme jasap.
QR Qarýly kúshteriniń XVI spartakıadasy aıasynda uıymdastyrylǵan shańǵy jarysynda elimizdiń eń úzdik áskerı sportshylary baq synasty.
Jarys baǵdarlamasy patrýlderdiń komandalyq saıysy jáne patrýlder estafetasynan (2h5 shaqyrym) turdy.
«Armııa sportshylary kezekti ret ózderiniń sporttyq sheberlikteri men jeńiske degen qulshynysy jáne tabandylyqtaryn kórsete bildi. Áskerı tapsyrmalar men mindetterdi oryndaýda shańǵy sportynyń alatyn orny erekshe. Sondaı-aq, áskerı sportshylar atys shebinde nysanany kózdep atýda kásibı sheberlikterin joǵary dárejede dáleldeı bildi. QR Qarýly kúshteriniń osyndaı jyl saıyn ótkizetin sporttyq jarystar áskerı mamandardyń daıyndyq barysyn odan ári shyńdaýyna oń yqpalyn tıgizedi. Óıtkeni, atalǵan sala mamandarynyń fızıkalyq daıyndyǵy únemi joǵary deńgeıde bolýy tıis»,- dedi Armııa ortalyq sport klýby- sport komıtetiniń tóraǵasy Aıtalap Qurǵambaev.
Sonymen, shańǵy tebýden 10 shaqyrym qashyqtyqta patrýlderdiń komandalyq jarysynda eń úzdik nátıjeni QR Qarýly kúshteriniń Kadet korpýsynyń áskerıleri kórsetti. Al kúmis júldeni «Shyǵys» aımaqtyq komandasynyń áskerı qyzmetkerleri ıelendi jáne qola júlde QR Áýe qorǵanysy kúshteriniń bas qolbasshysy basqarmasynyń sportshylaryna buıyrdy.
2h5 shaqyrymdyq patrýlder estafetasynda І oryndy QR Qarýly kúshteriniń Kadet korpýsynyń áskerıleri ıelendi. Al ІІ oryndy QR Qarýly kúshteriniń tyl jáne qarý-jaraq basqarmasynyń sportshylary qanjyǵalady, tıisinshe ІІІ orynǵa «Shyǵys» aımaqtyq komandasynyń áskerı sportshylary turaqtady.
Aıta keteıik, sporttyq báseke QR Qorǵanys mınıstrliginiń Armııa ortalyq sport klýbyna qarasty Şýchınskidegi shańǵydan oqý-jattyǵý bazasynda ótti.
