Şýchınsk turǵyny jarty mıllıon teńge aqshasyn ózi «urlaǵan» - Aqmola oblysy
KÓKShETAÝ. QazAqparat - Aqmola oblysy Şýchınsk qalasynyń 25 jastaǵy turǵyny óziniń jarty mıllıon teńgege jýyq aqshasyn ózi urlaǵan bolyp shyqty, dep habarlaıdy QazAqparat tilshisi.
Oblystyq ІІD baspasóz qyzmetiniń málimeti boıynsha aǵymdaǵy jyldyń 2-shi qyrkúıeginde Bulandy aýdandyq ІІB kezekshilik bólimine 25 jastaǵy Şýchınsk qalasynyń turǵyny aryzdanǵan. Aryzdanýshynyń sózine qaraǵanda, belgisiz bireýler onyń «Gazel» kóliginiń salonynda bolǵan 465 000 teńge aqshasyn jymqyryp ketken.
«Oqıǵa ornyna dereý jedel tergeý toby jiberildi. Jedel izdestirý sharasy barysynda polıtseıler zardap shegýshiniń túsiniktemesinen urlyqqa qatysty biraz málimetterdiń sáıkes kelmeıtinin ańǵardy. Keıin odan ári tergeý kezinde zardap shegýshiniń ózi kúdikti ekeni anyqtaldy. Zardap shegýshi ózine senip tapsyrylǵan aqshany ózi urlap, polıtsııaǵa joq uryny izdetip qoımaq bolǵan», dep túsindirdi polıtseıler.
Qazirgi kezde, kúdikti qylmysyn moıyndap, ústinen QR QK 188-babynyń 2-bólimi boıynsha qylmystyq iz qozǵaldy.
