Şýchede sporttyq bıden halyqaralyq týrnır jeńimpazdary anyqtaldy
KÓKShETAÝ. QazAqparat - Aqmola oblysynyń Şýche qalasynda «BURABAY - 2018» sporttyq bal bıi boıynsha halyqaralyq týrnır ótti, dep habarlaıdy QazAqparat tilshisi Aqmola oblysynyń dene shynyqtyrý jáne sport basqarmasyna silteme jasap.
Halyqaralyq jarysqa Qazaqstan, Reseı, Ýkraına, Belarýs jáne Ózbekstannyń 700-ge jýyq bıshisi qatysyp, baq synady.
«Qatysýshylar 2 kún boıy eýropalyq (baıaý vals, tango, vena valsi, fakstrot jáne kvıkstep) jáne latyn amerıkalyq bı (samba, cha-cha-cha, rýmba, pasodobl jáne djaıv) úlgilerin kórsetti. Jeńimpazdar jup, yrǵaq, syzyq, tepe-tendik, ártistik, aıaqpen jumys sııaqty krıterııler boıynsha anyqtaldy. Jarysqa 34 adamnan turatyn qazylar alqasy tórelik etti. Týrnır qorytyndysy boıynsha almatylyqtar jeńimpaz atansa, Aqmola oblysynyń bıshileri ekinshi oryn aldy. Al, úshinshi orynǵa qostanaılyqtar laıyq dep tanyldy», - dep atap ótti Aqmola oblysynyń dene shynyqtyrý jáne sport basqarmasynyń baspasóz hatshysy Mahabbat Bolshına.
Sonymen qatar, týrnır aıasynda jasóspirimder arasynda QR Resmı Kýbogy, barlyq jastaǵylar arasynda QR Federatsııa birinshiligi jáne Aqmola oblysynyń ashyq chempıonaty uıymdastyryldy.
Jarys QR Mádenıet jáne sport mınıstrligi, Aqmola oblysynyń dene shynyqtyrý jáne sport basqarmasy, Aqmola oblysynyń sporttyq bı federatsııasy jáne «Reverans» sporttyq bı klýbynyń uıymdastyrýymen ótkizildi.
