Şýchede sporttyq baǵdarlaý boıynsha Qazaqstan quramasynyń jalpykomandalyq jıyny ótedi
ASTANA. Tamyzdyń 31-i. QazAqparat /Marlan Jıembaı/ - Taıaý kúnderi Şýchede sporttyq baǵdarlaý boıynsha Qazaqstan quramasynyń jalpykomandalyq jıyny ótedi. Bul týraly búgin QR Sport jáne týrızm mınıstrliginde qysqy Azıada oıyndaryna shańǵyshylardyń daıyndyǵy máselelerine oraı ótken jıyn barysynda elimizdiń sporttyq baǵdarlaý jónindegi memlekettik jattyqtyrýshysy Irına Shvedova málim etti.
Qazirgi ýaqytta elimizdiń sporttyq baǵdarlaý jónindegi qurama komandasy 2011 jylǵy qysqy Azıada oıyndaryna daıyndyqtyń jazdyq kezeńiniń qorytyndy bóligin ótip jatqandyǵyn atap ótken ol, «sportshylar jeke jattyqtyrýshylarymen jeke baǵdarlamalar boıynsha ázirlenýde. Sonymen qatar taıaý kúnderi Şýchede jalpy jıyn ótedi», dedi.
Memlekettik jattyqtyrýshynyń aıtýyna qaraǵanda, quramanyń kóshbasshylary bolyp sanalatyn Olga Novıkova men Mıhaıl Sorokın qazirgi ýaqytta Bolgarııada jeke jospar boıynsha jattyǵyp jatyr. Jalpy barlyq sportshylar úshin daıyndyqqa qajetti barlyq jaǵdaı jasalǵan. «Sondyqtan bizdiń aldymyzǵa qoıylyp otyrǵan mindetter de óte joǵary. Biz osy joǵary senim údesinen shyǵýǵa tyrysamyz», dedi I.Shvedova.
