Şýchede Respýblıkalyq jańa shańǵy bazasy ashyldy
ASTANA. QazAqparat - Aqmola oblysynyń Şýche qalasynda shańǵy sportyna arnalǵan Respýblıkalyq jańa bazanyń ashylýy ótti. Jańa trassanyń múmkindikterin halyqaralyq FIS týrnırine qatysqan shańǵyshylar alǵashqy bolyp baıqap kórdi. Elimizdiń 10 oblysynan jáne Ýkraına, Reseı men Belarýs Respýblıkalarynan kelgen 100-ge jýyq sportshy baqtaryn synady. Jarystar shańǵy sportynyń 6 túri boıynsha ótti, dep habarlaıdy QazAqparat QR Mádenıet jáne sport mınıstrligine silteme jasap.
Habarlanǵandaı, atalǵan jarystyń arqasynda sportshylar Halyqaralyq shańǵy federatsııasy tizimindegi reıtıngterin kótere alady.
Aıta keteıik, jańa keshenniń qurylysy birneshe jylǵa jalǵasty. 2012 jyly shańǵy trassalaryna halyqaralyq sáıkestik sertıfıkatyn berý úshin jobaǵa álemdik jetekshi sarapshylar tartyldy. Qurylys kezinde mamandardyń barlyq usynymdary eskerilip, qorytyndysynda kez kelgen iri kólemdegi jarystardy ótkizýge múmkindik beretin sáıkestik sertıfıkattary alyndy.
19 naýryz kúni shańǵy bazasynda jarystyń alǵashqy kúni aıaqtaldy. Skıatlon dıstsıplınasyna otandyq sportshylarmen qatar Álem chempıonatynyń qol júldegeri, Qysqy Olımpıada oıyndarynda bes márte baq synaǵan ýkraınalyq Valentına Shevchenko da qatysty.
Erler toby 10 shaqyrymdy klassıkalyq stılmen júrip ótse, 10 shaqyrymdy erkin stılmen eńserdi. Nátıjesinde, birinshi oryndy Vıtalıı Pýhkalo, ekinshi oryndy Denıs Volotka, úshinshi oryndy Sergeı Malyshev enshiledi.
Jasóspirimder tobynda birinshi oryndy Nıkıta Grezın, ekinshi oryndy Ivan Lıýft, úshinshi oryndy Nıkıta Jarnosenko aldy.
Áıelder tobynda birinshi oryndy Anna Shevchenko aldy, kúmis Elena Kolomınada, al qola medal Marına Matrosovada.
Jasóspirimder arasynda birinshi oryn Anjelıka Tarasovada, ekinshi oryndy Ksenııa Shalygına ıelense, úshinshi oryn Ksenııa Jerdevaǵa buıyrdy.
Jarys uıymdastyrýshylary - QR Mádenıet jáne sport mınıstrligi, QR Ulttyq olımpıadalyq komıteti, «QR Ulttyq shańǵy jarysy federatsııasy» QB, Aqmola oblysynyń ákimdigi.
