Şýchede «Ózin-ózi taný» boıynsha respýblıkalyq forým ótti
KÓKShETAÝ. QazAqparat - Aqmola oblysynyń Şýche qalasynda QR Bilim jáne ǵylym mınıstrliginiń uıymdastyrýymen «Ózin-ózi taný» adamgershilik-rýhanı bilim berý baǵdarlamasynyń negizinde tárbıeleý jáne oqytý júıesiniń qyzmetin atqarý» atty respýblıkalyq forým ótti, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.
Vedomstvonyń málimetinshe, forýmda adamgershilik-rýhanı bilim berý baǵdarlamasyn júzege asyrýda úzdik pedagogıkalyq tájirıbemen almasý platformasy usynyldy.
Forýmnyń ashylýyna QR Bilim jáne ǵylym vıtse-mınıstri Sholpan Karınova qatysty.
Forým qatysýshylary oqýshylarǵa adamgershilik-rýhanı bilim berýdiń aǵymdaǵy jaǵdaıy men keleshegi, sonyń ishinde mektepke deıingi, jalpy orta, tehnıkalyq jáne kásiptik, joǵary bilim berý uıymdarynda «Ózin-ózi taný» adamgershilik-rýhanı bilim berý baǵdarlamasyn iske asyrý, jalpyadamzattyq qundylyqtar negizindegi otbasylyq tárbıeleý týraly máselelerin talqylady.
Forým jumysyna QR Bilim jáne ǵylym mınıstrliginiń ókilderi, «Bóbek» ulttyq ǵylymı-praktıkalyq bilim berý, saýyqtyrý ortalyǵynyń mamandary, «Ózin-ózi taný» adamgershilik-rýhanı bilim berý baǵdarlamasy boıynsha respýblıkalyq, joǵary, tehnıkalyq jáne kásiptik bilim berý uıymdarynyń úılestirý keńesteriniń músheleri jáne ata-analar qoǵamdastyǵynyń ókilderi qatysty.
Forým aıasynda «Bóbek» ulttyq ǵylymı-praktıkalyq bilim berý, saýyqtyrý ortalyǵynyń mamandary, oblystardyń jáne respýblıkanyń úzdik pedagogteri daıyndaǵan sheberlik-synyby ótkizildi.
