Şýchede anasy men 2 balasyn qutqarǵan órt sóndirýshi marapattaldy
KÓKShETAÝ. QazAqparat - Aqmola oblysy Býrabaı aýdanynyń ákimi Qanat Qaraýylov anasymen birge eki balasyn qutqarǵan 24 jastaǵy órt sóndirýshi Nursultan Qabenovti marapattady, dep habarlaıdy QazAqparat tilshisi.
Nursultannyń aıtýynsha, qarashanyń 13-nen 14 -ne qaraǵan túni Şýchedegi Sadovoı kóshesi boıyndaǵy turǵyn úıden órt shyqqan.
«Kottedjdiń órt shyqqan týraly habar tústi. Men sol kúni kezekshilikte edim. Araǵa 4 mınýt salyp, biz oqıǵa ornyna jettik. As bólmesinen bastalǵan órtten úıdiń birinshi qabatyn tútin basyp, ekinshi qabatyna taraı bastady. Al, ekinshi qabatta anasy men balalary boldy. 5 jáne 3 jastaǵy balalary uıyqtap jatty. Meni kórgende balalary ne bolǵanyn ózderi de túsinbeı qaldy. Áriptesterimniń kómegimen aldymen balalardy, keıin anasyn syrtqa shyǵardym. Al, áriptesterim gaz balonyn alyp shyqty», - dep túsindirdi búgingi kúnniń batyry Nursultan.
24-shi mamandandyrylǵan órt sóndirý bóliminiń órt sóndirýshisi osyǵan deıin de birneshe márte adamdardyń ómirine arasha túskenin, al balalardy qutqarý oqıǵasy birinshi ret basynan ótkergendigin aıtýda.
«Adamdar qutqarý oqıǵasy bizde jıi kezdesedi. Keıde adamdardyń bir jerge qystyrylyp qalýy sııaqty oqıǵalar bolyp turady. Keıde kópten kórinbeı ketken jalǵyz basty qarııalardyń kórshileri habarlasady», - deıdi Nursultan.
Ol óziniń áreketin erlikke balamaıdy, kerisinshe, mindeti dep esepteıdi. Jáne ıyq tirestirip, birge jumys istep júrgen áriptesterine alǵysyn bildirdi.
«Menniń óz áriptesterime degen alǵysym sheksiz. Olardyń erligi men mamandyǵyna degen adaldyǵyna bas ıemin» - dep tolyqtyrdy Nursultan.
