Şýche qalasynda 75 páterli turǵyn úı jyl sońyna deıin paıdalanýǵa beriledi
KÓKShETAÝ. QazAqparat - Bıyl jyldyń sońyna deıin Şýche qalasynda 75 páterli turǵyn paıdalanýǵa beriledi. Bul týraly búgin Aqmola oblysynyń ákimi Sergeı Kýlagınniń Býrabaı aýdanyna jumys sapary barysynda aıtyldy.
Aımaq basshysy aldymen Şýche qalasynda jańadan salynyp jatqan 75 páterli turǵyn úıdiń qurylysymen tanysty. Qurylys jumystaryn qolǵa alǵan merdigerlermen ótken kezdesýde nysandy jyl sońyna deıin salyp bitirý máselesi sóz boldy. Osy oraıda, aımaq basshysy aýdan basshylyǵy men merdigerlerge qaıtken kúnde de nysandy jyl sońyna deıin paıdalanýǵa berýdi tapsyrdy.
Eske sala keteıik, atalǵan turǵyn úıdiń qurylysy 2013 jyly qolǵa alynǵan bolatyn. Onyń quny joba boıynsha 859,7 mıllıon teńgege baǵalanyp otyr.
Odan ári aımaq basshysy Býrabaı kentindegi dárigerlik ambýlatorııanyń jumysymen tanysty. Oblys ákimi kýrortty aımaqqa jylyna 1 000 000 astam týrısterdiń keletinin aıta kele, aldaǵy keleshekte medıtsınalyq qyzmet sapasyn arttyrý maqsatynda jergilikti emhanany jóndeý kerektigin atap ótti.
«Keleshekte osynda jekemenshik klınıka salýdy oılastyrý qajet, sondaı-aq, áleýmettik jaǵynan az qamtylǵan halyqqa dári-dármekti jeńildikpen jiberýdi qarastyrǵan mańyzdy», dedi S.Kýlagın.
Aıta keteıik, Býrabaı kentindegi dárigerlik ambýlatorııa osy kúni 6 000 astam turǵynǵa qyzmet kórsetýde. Oǵan qosa, osynda demalýǵa keletin otandyq jáne sheteldik týrısterge de medıtsınalyq kómek kórsetiledi.
