SCAT jolaýshylar men stıýardessalar arasyndaǵy janjalǵa oraı túsinik berdi
ASTANA. QazAqparat - SCAT áýe kompanııasy ushaq bortyndaǵy aýa baptaǵyshtyń durys istemeýi saldarynan jolaýshylar men stıýardessalar arasynda týyndaǵan janjal úshin keshirim surady, dep habarlaıdy QazAqparat.
«Áýe kompanııasynyń atynan bortta bolǵan jolaýshylarǵa qatysty ekıpajdyń keıbir músheleriniń óreskel qylyǵy úshin keshirim suraýǵa ruqsat etińizder», - delingen kompanııanyń áleýmettik jelidegi resmı paraqshasynda jarııalanǵan aqparatta.
Taratylǵan aqparatta daý-damaı sebep bolǵan qyzmetkerlerge qatysty qyzmettik tekserý júrgizilip jatqany, ol aıaqtalǵannan keıin ákimshilik shara qoldanylatyndyǵy aıtylǵan. Sonymen qatar SCAT ákimshiligi ushaq ishinde aýa baptaǵyshty birden qospaǵandyqtary úshin de keshirim surady jáne onyń tehnıkalyq aqaýǵa baılanysty oryn alǵandyǵyn atap ótti.
«Ókinishke oraı, áýe kompanııasy ushaǵynyń qosymsha kúsh beretin qurylǵysy isten shyqty. Bul reıstiń oryndalýyna kedergi bola almaıdy. Biraq, salondaǵy aýa baptaǵysh áýe kemesiniń komandıri negizgi dvıgateldi otaldyrǵannan keıin ǵana iske qosylady. Qazirgi ýaqytta qosymsha kúsh beretin qurylǵyǵa tapsyrys berildi jáne ol Qazaqstanǵa jetkizilgen bettpe ushaqqa ornatylady. Degenmen, jolaýshylarǵa ásirese demalys kezinde qolaısyzdyq jasamaý úshin áýe kompanııasynyń basshylyǵy qosymsha kúsh beretin qurylǵy aýystyrǵanǵa deıin ushaqty kesteden almaý týraly sheshim qabyldaǵan edi», - dedi kompanııadan.
Esterińizge sala ketsek, №706 reısiniń jolaýshylary men stıýardessalar arasyndaǵy janjal kondıtsıonerdi qospaýdan týyndaǵan edi. Oqıǵa vıdeosyn ushaqta bolǵan jolaýshy áleýmettik jelidegi paraqshasyna júktegen edi.
