SCAT Ystanbulda ushaqtardyń soqtyǵysýyna túsinik berdi
«Ushaqtar jerde júrip kele jatyp, biri ekinshisin jeńil-jelpi syryp ketti. Keıbir buqaralyq aqparat quraldary barlyǵyn dúrliktiretin taqyryp qoıý arqyly jaǵdaıdy ýshyqtyryp kórsetti. Sondyqtan biz ushaqtyń zaqymdaný sıpattamasy tolyqtaı jazylǵan baspasóz habarlamasyn qaıta jiberip otyrmyz. Ol jerde el dúrligetindeı eshteńe bola qoıǵan joq. Eń qorqynyshtysy birneshe reıs keshiktirildi. Biz ol jaıynda jolaýshylardy eskerttik. Qazir barlyǵy da jetkizildi, keste boıynsha áýe reısteri keshigip jatqan joq», - dedi SCAT kompanııasy Qoǵammen baılanys jónindegi departamentiniń jetekshisi Vıktorııa Starojılova QazAqparat tilshisine.
Aıta keteıik, buǵan deıin birqatar BAQ-ta Ystanbul áýejaıynda eki áýe kemesiniń soqtyǵysqandyǵy týraly aqparat taraǵan bolatyn.
«26 shildede ushaqty (jerde) buryp kele jatqanda oń jaq qanatynyń ushy Boeing-777 áýe kemesiniń artqy jaǵyna tıdi. Eki ushaq ta jeńil-jelpi zaqymdandy. Qazirgi ýaqytta jaǵdaı tolyqtaı qalpyna keltirildi», - delingen bolatyn BAQ-ta taratylǵan aqparatta.