SCAT ushyrý qyzmetiniń dırektory Almaty mańyndaǵy ushaq apaty isi boıynsha 5 jylǵa sottaldy
ASTANA. QazAqparat - Almaty qalasy Almaly aýdandyq soty SCAT avıakompanııasy ushyrý qyzmetiniń dırektory V.Artemenkoǵa 21 adam qazaǵa ushyraǵan avıatsııa apaty isi boıynsha úkim shyǵardy.
«Sot sottalýshy V.Artemenkonyń áýe kóligi qozǵalysy men paıdalaný qaýipsizdigi erejelerin buzǵan, óziniń qyzmettik mindeti boıynsha bul erejelerdi saqtaýǵa tıis bolsa da, avıatsııa apatyna jol berildi, sonyń saldarynan 21 adam abaısyzda qazaǵa ushyrady», - delingen Almaty qalalyq sotynyń baspasóz habarlamasynda.
Eske sala keteıik, 2013 jylǵy 29 qańtarda Almaty oblysynyń Talǵar qalasy mańynda «Baıserke-agro» JShS aýmaǵynda «Kókshetaý-Almaty» reısin oryndaǵan áýe kemesi apatqa ushyrady. Ushaq jerge soǵylyp, qırady jáne onyń bortyndaǵy bes ekıpaj múshesi men 16 jolaýshy apat kezinde qazaǵa ushyrady.
Іs materıaldaryna sáıkes SCAT avıakompanııasynyń ushyrý qyzmetiniń dırektory V.Artemenko ushyrýlardyń qaýipsizdigi erejelerin saqtaı otyryp, ushyrý qyzmeti qyzmetkerleriniń biliktiligin arttyrýǵa, ushyrý ekıpajdarynyń oqytý baǵdarlamalaryn múltiksiz oryndaýǵa tıis bolatyn. Sonymen qatar ushqyshtardyń demalyp, kúsh-qaıratyn qalpyna keltirý quqyǵy da eleýli buzylǵan.
Sottan habarlaǵandaı, V.Artemenko áýe kemesin basqarýǵa daıarlyǵy nashar ekıpajǵa jol bergen, bul avıatsııalyq oqıǵanyń oryn alýyna tikeleı áser etken.
Sot sheshimimen QR QK 295-baby 3-bóliginde kózdelgen qylmysty jasaýǵa aıypty dep tanylyp, bes jylǵa bas bostandyǵynan aıyrýǵa, jazasyn qonys-kolonııada óteýge úkim shyǵaryldy. Sonymen qatar belgili bir qyzmetpen aınalysýǵa 2 jylǵa deıin tyıym salý túrinde qosymsha jaza taǵaıyndaldy.
Úkim zańdy kúshine engen joq.
