SCAT ushaǵyna naızaǵaı tústi: reıster kestesi ózgeredi

ASTANA. KAZINFORM – Naızaǵaıdan zardap shekkender joq. Bul týraly SCAT áýe kompanııasynyń baspasóz qyzmeti habarlaıdy. 

«Ótken demalysta SCAT áýe kompanııasynyń ushaǵyna naızaǵaı túsip zaqymdandy. Qazirgi ýaqytta ushaq kesteden shyǵaryldy. Kompanııanyń ınjenerlik qyzmeti birneshe kúnge sozylatyn qajetti tekserýler men jóndeý jumystaryn júrgizedi. Osyǵan baılanysty kompanııa osy aptadaǵy 14 áýe reısi kestesin ózgertýge májbúr», - delingen habarlamada.

Sondaı-aq, jolaýshylardan sms-eskertýlerge mán berip, reıster kestesin mobıldi qosymsha arqyly nemese áýe kompanııanyń resmı saıtynan (scat.kz) tekserýdi suraıdy.

Eske sala ketsek, shildede jolaýshylaryna qyzmet kórsetpegen FlyArystan men SCAT kompanııalary aıyppul arqalaǵany týraly habarlaǵan edik.