SCAT reısterdiń keshiktirilýine túsinistikpen qaraýdy suraıdy
ASTANA. QazAqparat - Jolaýshylar Jezqazǵanda reısterdiń keshiktirilýine jáne SCAT áýe kompanııasynyń eski ushaqtaryna shaǵym aıtyp jatyr, dep habarlaıdy QazAqparat tilshisi.
Feısbýk áleýmettik jelisiniń qoldanýshysy Baqytkeldi Nııazbekov Jezqazǵanda reıstiń bir kúnge kidirip, keıin eski AN-24 ushaǵynyń kelgenin málim etken.
«4 jyl buryn osy AN áýe kemesine mingenimde, baratyn jerime jetkize me degen kúmánmen ushyp barǵan edim. Sol reıste de jolaýshylar janjal shyǵaryp, SCAT-tan qalypty bortty talap etken bolatyn. Kompanııa jaz maýsymynda ushaqtar jetispeı jatqan kezde tanymal emes baǵyttarǵa sol burynǵy AN ushaǵyn jiberedi. Jezqazǵan burynǵy oblys ortalyǵy bolǵanymen, elimizdiń bıýdjetine mys arqyly úlken tabys túsirip otyrǵan qala. Jalpy, AN-24 - senimdi ushaq dep aıtady, biraq mundaı eski áýe kemesin qoldanystan shyǵarǵan durys. Sebebi, jyl ótken saıyn tek temir emes, adamdar da sharshaıdy», - dep bólisti ol óz pikirimen.
Bul jaǵdaıǵa SCAT kompanııasy pikir bildirip, taıaýda bul máseleni sheshýge ýáde etti.
Baspasóz qyzmetiniń deregi boıynsha, áýe kompanııasynyń kestesinde ishki marshrýttarda birshama reısterdiń keshigýine baılanysty SCAT túrli áýe kemelerimen turaqty túrde ártúrli baǵyttarǵa ushatyn birqatar qazaqstandyq áýe kompanııalarymen shart jasasqan.
«Áýe kompanııalarynyń biriniń parkinde AN-24 úlgisindegi áýe kemesi bar. Áýe kompanııasy shart jasasardyń aldynda kompanııa parkteriniń tehnıkalyq jaǵdaıyn tekserip, sodan keıin ǵana kelisim jasady. Jolaýshylar áýe kemesiniń úlgisin aýystyrýdy ýaqytynan buryn eskertýde. SCAT áýe kompanııasy basqa áýe kompanııalarymen kelisim jasap, ushý kestesindegi aqaýlardy qalpyna keltirip jatyr. Taıaý ýaqytta bul jaǵdaı birqalypqa keltiriledi. Áýe kompanııasy jolaýshylardan keshirim surap, bolǵan jaǵdaıǵa túsinistikpen qaraýlaryn suraıdy», - dep habarlady baspasóz qyzmetinen.
