SCAT «Nur-Sultan - Tokıo» jańa halyqaralyq reısin oryndaýdy bastaıdy
«Atalǵan baǵyttyń ashylýy halyqaralyq qarjy ortalyǵynyń damýyna yqpal etedi. Bul rette álemdegi iri qarjy ortalyqtarymen baılanysty basymdyqty baǵyt retine belgiledik. Meniń oıymsha, bıznespen, qarjymen, ınvestıtsııamen aınalysatyn adamdar úshin óte jaqsy múmkindik bolady. Osy oraıda Nur-Sultannan Tokıoǵa jyldam jetý úshin jaǵdaı jasalyp otyr. Bul reıske suranys joǵary bolady degen senimdemiz», - dedi QR IIDM Azamattyq avıatsııa komıtetiniń tóraǵasy Talǵat Lastaev.
Osy oraıda ol 2019 jyldyń basynan bastap «Nur-Sultan - Ulan-Bator», «Nur-Sultan - Praga» jáne basqa da jańa halyqaralyq reıster ashylǵanyn eske saldy.
«Ǵalymdardyń zertteýlerine sáıkes, sheteldik jolaýshylardyń tranzıtpen kelýinen ǵana Qazaqstan ekonomıkasyna qosymsha túsetin túsimder jylyna shamamen 40 mln AQSh dollaryn quraýy múmkin», - dep atap ótti komıtet tóraǵasy.
Óz kezeginde Japonııanyń Qazaqstandaǵy Elshisi Tatsýhıko Kasaı ashylǵaly otyrǵan reıs eki eldiń arasynda baılanystardy nyǵaıtýǵa eleýli úlesin qosa alatynyn atap ótti.
SCAT áýe kompanııasynyń vıtse-prezıdenti Vladımır Sytnık jańa reıs elorda kúnin merekeleý kezinde ashylyp otyrǵanyn aıta kele, bul baǵdardy iske qosý biraz kúsh-jigerdi qajet etkenin jetkizdi.
«Memlekettiń jáne Japonııanyń Qazaqstandaǵa elshiliginiń qoldaýy nátıjesinde reısti ashý múmkin bolyp otyr. Reıs ár senbi saıyn Japonııaǵa qaraı oryndalady. Osy oraıda bizdiń jolaýshylar úshin bul sapar barynsha qolaıly bolýyn qamtamasyz etýge tyrysamyz», - dedi V. Sytnık.
Budan buryn habarlanǵandaı, jaqynda «Nur-Sultan - Tokıo» baǵyty boıynsha áýe bıletteriniń satylymy bastalady.
6 shildeden bastap Tokıo ár senbi saıyn Qazaqstannan týrısterdi qabyldaıdy. Aldaǵy ýaqytta SCAT Japonııa astanasyna ushatyn reısterdiń bir aptadaǵy jıiligin arttyrýdy josparlap otyr.
