Scat áýe kompanııasynyń ushaǵy Astanadan Egıpetke usha almady
ASTANA. QazAqparat - Astanada Scat áýe kompanııasynyń ushaǵy tehnıkalyq sebeptermen Egıpetke, Sharm-el-Sheıh kýrorttyq aımaǵyna usha almady, dep habarlaıdy QazAqparat.
Scat kompanııasynyń habarlaýynsha, ushý aldynda áýe kemesin daıyndaý kezinde qosymsha qyzmet kórsetý qajettiligi týyndaǵan. Kompanııa mundaı jaǵdaıdyń kez kelgen áýe kompanııasynda kezdesetinin atap ótti.
«Jolaýshylardy uzaq bógemeý úshin ushaqty ózge bortqa aýystyrý jóninde sheshim qabyldandy. Ózge qalalardan kelgen jolaýshylar qonaq úıge ornalastyrylyp, tamaqpen qamtamasyz etildi. Jergilikti jolaýshylar úılerine qaıtaryldy, ushaqqa keshikpeý úshin olarǵa aldyn ala habar beriledi», - dep habarlady Scat.
Áýe kompanııasynyń habarlaýynsha, qazir Egıpetke jiberiletin ózge ushaq ázirlenýde. Bul birshama ýaqytty qajet etedi.
Foto: newstracker.ru
