SCAT áýe kompanııasy tarıfterin 20 paıyzǵa ósirmek
ASTANA. QazAqparat - SCAT áýe kompanııasy Qazaqstan Respýblıkasynyń ulttyq valıýtasynyń erkin baǵamǵa ótýine baılanysty 25 tamyzdan bastap halyqaralyq baǵyttarǵa tarıfterdi májbúrli túrde 20 paıyzǵa ósiretini týraly habarlap otyr, dep jazady áýe kompanııasynyń saıty.
Kompanııanyń baspasóz qyzmetiniń habarlaýynsha, bul sheshim reısterdi qamtamasyz etý, áýe kemelerine tehnıkalyq qyzmet kórsetýdi ótkizý, qyzmetkerlerdi qaıta oqytý shyǵyndarynyń kóbi jáne ózge de shyǵyndardyń AQSh dollarymen óteletin avıatsııalyq salanyń ereksheligine baılanysty qabyldanyp otyr.
«Atalǵan shara kompanııanyń kiris bóligin arttyrýǵa baǵyttalǵan joq, sebebi dollardyń teńgege qatysty turaqsyz baǵamymen baılanysty barlyq shyǵyndardy óteı almaıdy. Tarıfterdi belgilengen paıyzǵa arttyrý tek halyqaralyq reısterdi qamtamasyz etýmen baılanysty shyǵyndardyń keıbir bóligin ǵana óteýin qamtamasyz etedi», - delingen habarlamada.
