SCAT áýe kompanııasy reısterdiń kidirýi jıilep ketý sebebin túsindirdi
ASTANA. QazAqparat - «SCAT» áýe kompanııasy jıilep ketken reıstik kidiristerdiń sebebin túsindirdi. Bul týraly QR IDM Azamattyq avıatsııa komıteti «SCAT» áýe kompanııasy reısterdiń kidirýi jıilep ketý sebebin túsindirdi">Feısbýktegi paraqshasynda jazdy, dep habarlaıdy QazAqparat tilshisi.
«Áýe kompanııasynyń aqparatyna sáıkes, atalmysh kompanııanyń áýe kemeleri 2017 jyldyń ortasynda bekitilgen kestege sáıkes josparly túrde tehnıkalyq qyzmet kórsetýdiń «aýyr» qalpyna jóneltilgen. Alaıda tehnıkalyq qyzmet kórsetetin uıymdar jumysbastylyǵyna baılanysty áýe kompanııasynyń birneshe áýe kemesi boıynsha qyzmet kórsetý baǵytyndaǵy jumysty bekitilgen merzimnen kesh bastaǵan. Qazirgi ýaqytta jazǵy kestege saı ushýy tıis 2 áýe kemesi Túrkııada tehnıkalyq qyzmet kórsetýden ótip jatyr», - delingen habarlamada.
Habarlanǵanyndaı, atalmysh áýe kompanııasynyń reısterine qatysty shaǵymdar kóbeıip ketkendikten, Azamattyq avıatsııa komıteti «SCAT» áýe kompanııasynyń basshylyǵymen birge ushý kestesin turaqtandyrý men keleshekte kemshilikterge jol bermeý baǵytynda jumys júrgizgen.
«15 maýsym men 15 shilde aralyǵynda «SCAT» áýe kompanııasynyń kestesine tasymaldaýshynyń operatsııalyq jumysyna baılanysty ózgerister engizilgen. Aldaǵy ýaqytta uzaq kidiristi boldyrmaý úshin áýe kompanııasy birneshe reısterdi toqtatý týraly sheshim shyǵarǵan. Áýe kompanııasynyń bul qadamy qazirgi qoldanystaǵy zańnamaǵa jáne halyqaralyq erejelerge qaıshy kelmeıdi. 10 maýsym men 3 shilde aralyǵynda reısterdiń shamamen 10 paıyzy oryndalmaǵan. 14 paıyzy kem degende eki saǵattan keıin ushqan», - delingen AAK habarlamasynda.
Komıtette atalyp ótkendeı, reısterdiń kidirýi ushaqtar jıi ushatyn baǵyttarda (Astana - Almaty, Almaty - Astana, Shymkent- Almaty) tirkelgen. Sonymen qatar, birneshe baǵyttaǵy reısterdiń kestesi qaıta qaralǵan. Astana - Shymkent, Astana - Mıneraldy sýlar, Astana - Pavlodar, Almaty - Aqtaý, Astana - Almaty, Almaty - Astana, Astana - Aqtaý jáne Almaty - Shymkent reısteri boıynsha keste ózgertilgen.
«Jolaýshylardy kóptiginen keıbir baǵyttarda reısterdiń kidiretini týraly áýe kompanııasy jolaýshylardy ýaqtyly eskerte almaı qaldy. Jolaýshylarǵa yńǵaıly bolý úshin áýe kompanııasynyń saıtynda klıentterdi qoldaýǵa arnalǵan +7 (7252) 99-88-80, scat@scat.kz baılanys nómirindegi kómek ortalyǵy bar. Ortalyq táýlik boıy jumys atqarady. Áýe kompanııasy ýaqtyly ushpaǵan jáne kidirgen reıster úshin jolaýshylardan keshirim suraıdy. Áýe kompanııasynyń aqparaty boıynsha, shilde aıynyń ortasynda qatarǵa eki ushaq qosylady. 15 shildeden bastap kompanııa kesteni tolyq qalpyna keltiredi», - delingen habarlamada.
Aıta ketsek, budan buryn jolaýshylar Jezqazǵanda reısterdiń keshiktirilýine jáne SCAT áýe kompanııasynyń eski ushaqtaryna shaǵym aıtqan bolatyn. Feısbýkte qoldanýshy Baqytkeldi Nııazbekov Jezqazǵanda reıstiń bir kúnge keshiktirilip, keıin eski AN-24 ushaǵynyń kelgenin málim etken.
Sonymen birge, «SCAT» áýe kompanııasy Almaty-Astana baǵytyndaǵy reısterdiń nege ushpaǵany jaıynda túsinikteme bergen edi.
